Diego de Cuba, Presidente di STA:
- Doño di trabao a haya ta bon di no paga nan salario
ORANJESTAD (AAN) E lider sindical di STA (Sindicato Trahadornan Arubano), Diego de Cuba, a convoca miembronan di prensa, Dialuna mainta, durante un accion di protesta di trahadornan di Thiel Resources y Thiel Corporation na Canashito.
“Esaki mirando e hecho cu atrobe e compania ta echando baina. For di Diahuebs siman pasa, por a wak tur e empleadonan mi tras aki, cu mester a cobra nan salario pero nan no a cobra, pa motibo cu e Gerencia a haya ta bon pa no paga nan. E situacion aki, nos di sindicato STA ta hay’e un abuso di marca mayor. E compromiso di STA ta pa mantene e cuponan di trabao den cualkier compania, y tambe ta vigilante di cualkier contrato colectivo y e leynan laboral”, De Cuba a relata.
E lider sindical a sigui splica cu si mira kico ta pasando aworaki unda cu Thiel a haya ta bon pa no paga su empleadonan, comokiera cu e mayoria a afilia na Sindicato STA, kiermen tin un forza basta grandi aworaki den Thiel Corporation y Thiel Resources.
“E situacion aki claro cu ta bay desemboca den un accion di protesta. Tin cu compronde cu e hendenan aki tur ta spera riba nan entrada di fin di luna, pa nan por paga tur nan cuentanan y tambe pa nan por come, un falta di respet di halto grado”, e sindicalista a señala.
El a sigui informa cu pa e motibo aki STA a manda varios carta pa Thiel, pa WAB (Werkgevers Arubaanse Bouwnijverheid) tambe. “Pasobra nos kier sinta cu directiva di WAB, pa wak si meneer Thiel ta drecha su comportacion pa cu e trato cu e ta dunando su empleadonan y no esey so, pa wak si e ta cumpli cu e contrato colectivo y tur locual tin rond di dje, entre otro, e pensioen tambe di e trahadornan di Thiel”, Diego de Cuba a subraya.
