Cu emocion y entusiasmo Adriaan Berg ta splica:
ORANJESTAD (AAN) – Fundacion Centro di Famia Piedra Plat, a duna un conferencia di prensa, den cual, na prome lugar, señor Adriaan Berg a hiba palabra. El a bisa cu e Centro ta desaroyando for di aña 2010, y e ta creciendo hopi en general. Ultimamente, nan ta poniendo hopi enfasis riba e aspecto cultural y social, unda a combina tur dos hunto.
“Actualmente, nos ta preparando pa haci un presentacion dia 13 di December, cuminzando 6’ or atardi, cu nos ta yama ‘Let’s Act’ cu ta bin cu sosten di CEDE Aruba, cu ta sponsor e proyecto aki, na unda nos ta duna oportunidad pa tur hende, sin excepcion, pa bin participa den e proyecto aki, specialmente esnan di poco recurso” señor Berg a indica.
E proyecto aki ta consisti di lesnan di musica, baile, teatro, cosemento, schilder, canto, etc. Nos ta ocupa trahando riba e proyecto aki desde aña pasa, y aworki ta yega e momento pa nos presenta na comunidad locual cu nos a haci durante un aña largo, preparando e hendenan. “Tur ta hendenan simpel, cu hopi biaha no tin oportunidad pa paga pa haya les di arte. “Nos ta cobra un prijs simbolico, p’asina tur hende tin oportunidad pa participa. Anto, nan a entrena masha duro mes, y locual nan a siña for di dje, nan ta bay presenta dia 13 di December”, señor Adriaan Berg a duna di conoce.
El a sigui splica cu e publico ta bay mira muchanan y hende grandi cu a traha diferente pintura, y ta bay tin un exposicion di tur e obranan cu ta wordo haci.
Ta bay tin tambe un pasarela di hendenan cu a siña cose y nan mes ta traha nan shimis, y nan ta bay bisti nan pa mustra den pasarela locual nan a cose.
“Mescos cu e parti di danza. Nos tin hende cu nunca nan a balia. Pa prome biaha nan a haya les di baile, y awo ta bay haya e oportunidad pa present’e na publico, anto mi ta un di nan”, señor Berg a expresa.
El a agrega cu e parti di teatro tambe nan ta bay presenta un obra traha pa un di e alumnonan mes. “E obra ey bo no ta hay’e ningun caminda. E ta bay wordo presenta en combinacion cu baile. E ta bay ta un fiesta cu nos ta yam’e ‘Fiesta di Fin di Aña Crioyo’, algo di nos, cultura, etc. E ta bay ta un presentacion fabuloso”, Adrian Berg a informa y invita pueblo pa bin wak e presentacion aki cu ta di nos mes.
