Luenne Gomez-Pieters, Directora di DIMP
ORANJESTAD (AAN): E cumplimento di ciudadanonan pa cancela pago di plachi di number di vehiculo di motor, a aumenta e aña aki. Te awor Departamento di Impuesto (DIMP) a registra 89% di contribuyentenan cu a paga caba compara cu añanan anterior cu tawata yega entre 80 pa 83 %. E cambio aki den comportacion di pago di e impuesto aki ta algo hopi positivo, y awor ta keda 11% cu mester atende cu nan, segun Directora di DIMP, señora Luenne Gomez-Pieters a expresa den un entrevista cu DIARIO.
Desde cu DIMP a anuncia cu Polis lo cuminsa controla plachi di number di vehiculo di motor na september, a realisa cu citanan na e departamento a aumenta. Sinembargo, den practica, e pago ta keda un problema debi cu hopi contribuyente tin acumulacion di debenan habri. Un bes den 5 aña ta otorga plachi di number nobo. E tendencia den comportacion di pago di hopi cliente ta pa paga plachi di number di auto den e aña cu ta otorga plachi nobo, mientras ta keda acumula debe di varios aña. Esaki ta pone cu e contribuyente ta drenta den problema financiero y no por cancela e debe actual ni e debenan atrasa.
Segun Gomez-Pieters, e comportacion aki ta mescos den caso di seguro di auto. Clientenan ta cera seguro pa un luna, nan ta busca nan plachi di number nobo cu ta vigente y despues cu nan haya plachi di number nobo, nan no ta sigui paga seguro. Esaki ta trece un problema na momento cu nan ta envolvi den un accidente, no solamente nan ta keda cu gasto grandi, pero por causa gasto grandi pa otro automobilistanan cu si tin nan seguro na ordo.
Señora Gomez-Pieters a remarca cu DIMP ta den combersacionnan cu companianan di seguro pa busca y sondea posibilidadnan entre otro pa cambia ley pa acopla seguro cu e termino di pago di impuesto.
