‘Silver Entrepreneurship’ Workshop pa pre-pensionadonan tabata bon atendi

ORANJESTAD (AAN): Recientemente Departamento di Asuntonan Economico, Comercio y Industria mediante su unit di Iniciativa pa Desaroyo pa Empresa Arubano (IDEA)

a organiza e workshop di ‘Silver Entrepreneurship for retired or soon to be retired’, pa tur (pre-) pensionado cu ta desea di uza nan carera y experiencia di bida den nan mesun negoshi.

   E siguiente oradornan a sa di presenta profesionalmente cu e siguiente topiconan informativo y interesante:

   Dave Martinus, Certified Business Coach di ActionCOACH, a presenta ‘Resources to Help you Become an Entrepreneur’, a enfoca cu si bo kier ta un comerciante profitabel bo tin cu corda pa traha ‘ariba’ bo negoshi y no solamente ‘den’ bo negoshi.  Señora Louella Croes, Business Development Advisor den unit IDEA na Departamento di Asuntonan Economico, a presenta e informacion, guia y tur e educacion nan cu nan ta ofrece pa prepara pa habri un negoshi of pa maneha un negoshi mas eficiente y manera debe ser.

   Señora Mary Baarh, hoofd di e afdeling di Vestiging van Bedrijven na Departamento di Asuntonan Economico, Comercio y Industria, a elabora riba e permiso y ley pa establecimento di negoshi, definicion di un negoshi, liña di maneho di gobierno, procedura pa introduci un peticion.  Señor. Enrico Soto y señora Sharina Hernandez di Douane Aruba a presenta informacion nan importante (incluyendo producto y materialnan liber di impuesto) pa esun nan cu ta importa producto/material pa nan actividadnan comercial y tambe pa esun nan cu lo bay exporta nan producto.   Departamento di Asuntonan Economico, Comercio y Industria, señora Gayle Arendsz a conscientisa e participantenan di e 17 metanan di SDG (Sustainable Development Goals) y despues el a enfatisa e.o. riba Corporacion Sostenibel, Compas di SDG y e Liderazgo Sostenibel cu por worde practica den bo negoshi pa tin un maneho sostenibel den bo actividad nan comercial.

   Notario Johnson; a presenta temanan di: formanan legal di negoshi (eenmanszaak/ NV/ VBA), sucesion empresarial, diferencia den forma legal di companianan ora cu bo lo kier cuminsa un negoshi y tambe a presenta tocante testament/herencia (kico por laga atras y pa ken).   Cristian Garcia di SVb a duna hopi informacion valioso na tur presente tocante e primanan social pa un dunado di trabao y e trahado.   Julieta van der Biezen, kende ta un financial controller y ta doño di You Count Administration & Consultancy, a haci su presentacion hopi claro tocante, Small Business Administration;

   Ludwig Rasmijn y sr. Randy Maduro di Santa Rosa, a elabora tocante posibilidadnan pa bira un Agripreneur. Temanan cu a bin dilanti durante nan presentacion tabata tocante Aquaponics, Hydroponics, productonan local, hofi chikto, matanan chikito, con pa baha gastonan, con bo por haci di bo hobby un negoshi.  Benny Richardson, tabata tremendo. Sr. Richardson ta un Training Coach. Un meneer di 80 plus, curpa bon teni y fisicamente hopi saludabel a bin cu su presentacion y tabata sa con pa inspira y conscientisa tur presente tocante nan ‘life style’, comemento saludabel y movemento, cu ta e secreto pa keda den un ‘healthy shape’.

   Ulrich Hermans y Francois Croes, Innovation Advisors di Futura, a presenta e.o. ‘Future of Work’, e futuro skills nan pa 2025 etc. Tambe nan a haci un ehercicio chikito pa analisa e problemanan cu lo por encontra den nan trayectoria pa por start un negoshi.  Judella Trim di Departamento di Asuntonan Economico, Comercio y Industria/unit IDEA, a presenta pakico un Business Plan ta importante y tambe con pa traha un plan di negoshi.

   Tabata tin tambe intercambio di experiencia di:  Lionel Rumnit, kende ta specialisa como Job Coach na ‘Trampolin pa Trabao’, y a conta, con e ta train e personanan cu desabilidad pa den futuro por dentra den mercado laboral den nos sociedad. Señora Susie Franken, propietaria di Djiespie’s Place; a comparti e storia di nan negoshi di famia cu e participantenan y con nan a crece durante e ultimo añanan cu nan actividad nan pa nos grandinan;   Merrill Robles (un pensionado), a conta con e a yuda comunidad pa medio di su negoshi y pafor di su negoshi.

   Un total di 16 persona a participa activamente den e workshop aki y a ricibi riba e ultimo dia un ‘certificado di participacion’, cu a worde entrega door di minister Sr. Geoffrey Wever. Minister Ursell Arends tambe tabata presente e ultimo dia di certificado.