𝘔𝘪𝘯𝘪𝘴𝘵𝘦𝘳 𝘙𝘰𝘤𝘤𝘰 𝘛𝘫𝘰𝘯: "Algo historico" --- ORANJESTAD (AAN): Durante un ceremonia hopi emocionante, a experencia con siete di e damanan cu a inicia cu e trayecto di ”Sociaal Vormingstraject” (SVT)
a logra termina e prome parti di nan entrenamento, caminda nan a pasa e parti intensivo di entrenamento den naturalesa. Esaki ta conoci como e parti di “vorming” unda tur e caracterisitacanan y disciplina militar ta e enfoke.
Como cu a logra finalisa e parti aki exitosamente, nan a ricibi nan baret, asina promoviendo e hobennan, y concluyendo e parti di formacion. E siguiente paso lo bira e parti di “opleiding”, unda cu nan lo haya diferente tipo di curso y entrenamento pa asina termina cu nan trayecto. Finalmente, despues di conclui e formacion completo, e damanan aki lo ta cla pa asina sirbi Aruba dignamente.
E traspaso aki di “vorming” pa “opleiding” ta uno historico, como cu esaki lo ta e prome grupo di SVT cu ta inclui hende muher. Esaki no ta conta pa Aruba so, si no tambe pa Reino Hulandes.
Ta aplaudi e esfuerso di tur e socionan cu a haci esaki posibel, entre otro Mariniers Kazerne (MSKSAV), “CZMCARIB “ (Commandement der Zeemacht Caribisch Gebied), ARUMIL, Gobierno di Aruba, Ministerio di Asuntonan Social, caminda cu Minister Glenbert Croes a forma parti di e inicio di e proyecto aki y Bureau Sociale Vorming.
Nos ta gradicido na e curashi y determinacion cu e la tuma pa a inicia un proyecto asina impactante y revolucionario. Aruba por ta orguyoso di por bisa cu awor, damas tambe por forma parti di nos ekipo militar.
Diabierna awor lo tene e ceremonia oficial, caminda lo otorga un certificado na e hobennan aki, y na e mesun memento traspasa e proyecto di SVT di Minister Glenbert Croes pa mi persona. Ta gradici Minister Croes pa su tremendo aporte pa e proyecto unico aki, y awor nos lo percura pa sigui cu e bon trabou y finalisa e hazaña aki, asina Minister Rocco Tjon a indica.
