Acuerdo cu Hulanda ta entrega exigencia di superacion nacional --- *Mester recupera structura basico den ehecucion periodismo --- *Obhetividad mester di conocemento personal pa por informa
ORANJESTAD (AAN) — 2022 ta na caminda y lo trece cambionan grandi pa mundo y asina pa Aruba tambe.
Poniendo un banda e ultimo desaroyonan di Omicron y diferente aspectonan nobo di e Coronavirus cu por presenta, mester presta atencion na asuntonan importante cu ta spera Aruba na 2022.
For di momento cu supervision Hulandes a haci su entrada na Aruba, prueba a wordo entrega cu algo a cambia na Aruba compara cu e momento cu Reino Hulandes a entrega Aruba e Status Aparte na 1983.
Na momento cu Reino Hulandes a yama danki na tur cu a coopera pa e cambio historico, Reino Hulandes a afirma cu Aruba tabata capaz pa para riba su propio pia.
Pa evita cu algo por pasa y Reino no por actua na bienestar di Aruba, Statuut ta duna Reino e armanan pa defende e bienestar di e ciudadano Arubano cu no por wordo perhudica dor di politiconan di e pais.
Esaki a haci cu ora cu Reino a mira na 2014 cu bienestar di e Arubianonan tabata na peligro, Ministro Hulandes Plasterk a bini Aruba y a papia cu ex Prome Ministro Mike Eman y a impone supervision Hulandes.
Hulanda asina a duna e ciudadanonan di Aruba e garantia cu ora Gobierno di Aruba faya cu bon gobernacion, e ta actua y ta implementa bon gobernacion cu sigur ta contene un bon maneho financiero di placa di Pueblo.
For di e momento, Reino a recorda tur sector cu nan mester carga nan responsabilidad encera den Statuut, cu ta exigi vigilancia y guia di gobernacion na nomber di Pueblo.
E arma mas importante cu Pueblo tin pa sigura su bienestar, ta Prensa na un pais liber.
Pa Prensa por funciona mescos cu tur gremio y sector, e mester ta na haltura di loke e ta haci y di loke e ta controla.
Prensa tin e tarea di splica Pueblo kico un gobernante ta bisa, kico e ta papia y kico e ta haci. Prensa tin e tarea pa pone esaki den cuadro di leynan di e pais, cu ta base di e estadoi di derecho cu Prensa mester percura pa funciona y cu Prensa mester defende.
Kico esaki ta nifica?
Na prome luga Prensa mester ta na haltura di loke nos leynan ta exigi pa gobernacion di Aruba.
Prensa mester atende cu rapportnan cu mira luz. Prensa mester pone actuacion di gobernantenan di tur e alanan di Trias Politica, pero tambe e aparato gubernamental y tur loke ta Aruba den luz di loke ley ta bisa.
Prensa mester conoce ley y mester conoce e forma cu e pais mester funciona riba tur tereno.
Esaki ta e esencia di periodismo, cu no mester depende di loke un politico of ciudadano kier bisa, pero di loke prensa a investiga y ta trece dilanti.
E Acuerdo cu Aruba a firma cu Hulanda ta papia di restauracion di e Estado di Derecho di Aruba y asina ta impone un responsabilidad directo pa Prensa cu ta informa publico na forma independiente y liber a base di conocemento di prensa.
Si politiconan no atende cu Prensa a base di sinceridad, ora e berdad wordo descubri, Prensa mester coregi su eror.
2022 lo nifica un grado enorme di responsabilidad di henter Pueblo na momento sigur si tene cuenta cu e Acuerdo cu a firma cu Hulanda na 2020.
Prensa lo ocupa un lugar special y mester ta capacita pa atende cu su responsabilidad pa informa Aruba na un forma realmente liber pa den libertad, Aruba por construi un futuro nobo manera a pasa den e lucha pa Status Aparte.
