Siete dama a crea STEM Embassy pa sigui pusha hobennan pa bay den ciencia cu tecnologia y ingenieria

ORANJESTAD (AAN): E siman aki sigur ta uno hopi alentador, ora cu a bira conoci cu un grupo di dama impresionante ta pone nan granito di arena

pa asina trata na empuha e isla aki den un pais cu ta tecnologicamente mas avanza y cu nan bista dirigi riba ciencia, tecnologia, ingenieria, y matematica.  Y tur esaki na man di un team dirigi pa hende muher!

   DIARIO tabata presente den oranan di atardi na e aula di Universidad di Aruba, na momento cu a introduci e asina yama ‘The STEM Embassy’.  STEM aki ta referi na ‘Science, Technology, Engineering y Mathematics’.

   The STEM Embassy ta un organizacion nobo cu ta consisti di 7 studiante, 4 di Aruba y 3 di Curaçao cu ta studiando na Hulanda, Merca y Suiza. E team ta consisti di Maia Rigot, Syari Sinlae y Lau Garcia-Dieguez di Curaçao.  Tambe Laura Croes, Jillian Oduber, Dianthy Kock y LeAnn Tromp di Aruba.

   Cua ta e delaster dia cu bo a keda sin usa tecnologia? Pa mayoria hende sigur e contesta riba e pregunta lo ta: “Mi no sa”. Tecnologia a bira algo cu nos no por biba sin dje.

   E necesidad pa ingeniero ta birando mas y mas grandi, y e cantidad di hoben cu ta scohe pa bay studia den e ramo nan di STEM no ta creciendo suficiente. E pregunta ta: Con nos por combati e problema aki?

   Esey ta e meta di The STEM Embassy (TSE).  Y tur e siete damanan aki tin e mesun mision: “Pa lanta curiosidad y confianza pa STEM, den un ambiente cu ta accesible na un y tur na e isla nan ABC. Nan lo kier haci STEM mas accesible posibel pa esnan na Aruba, Bonaire y Curaçao.

   Nan a splica cu TSE ta organizando un 2-day STEM camp: “Kico ta bo STEM?”pa mucha nan entre 12-21 aña di edad. E evento ki lo tuma lugar 21 y 22 di juli na Universidad di Aruba.

   Tabatin 8 diferente workshop incluyendo robotics, coding, sustainable technology y un biology agar art. Tabata tin 100 luga available y nos a yena nan den 10 dia! Nos nunca no a kere cu lo tin asina hopi interes den un evento asina, dus nos ta hopi contento di wak cuanto hende ta interesa den e area nan aki y esaki a motiva nos mas pa sigui planea e evento nan ki den futuro.

   Nan ta hopi entusiasma pa e event ki y pa duna e mucha nan di Aruba e chance pa descubri kico precies STEM ta y kico tur nan por haci cu un estudio den STEM.

22 di juli ta sera e evento cu The STEM Festival. Akinan lo tin diferente compania y organisacion nan presente cu booths pa duna e mucha nan y publico mas informacion over di STEM den nan ambiente.

   E evento aki ta habri pa publico y e famia nan di e mucha nan pa nan por mustra kico tur nan a traha den e dos dia nan ey. Na e evento tambe lo tin un panel discussion y awards pa e mucha nan. Nan ta trahando hunto cu e ‘sister organization ATech pa haci e evento aki posibel.