Investigacion riba eficiencia y efectividad den cuadro di 'F3 Model' a wordo entrega na Maart 2022

Minister Dangui Oduber:

ORANJESTAD (AAN) --  Minister di Salud y Turismo, Dangui Oduber a indica, den conferencia di prensa Diahuebs, cu den luna di Mei 2020 AZV a cuminza cu implementacion di tur loke e Five Ways Model ta contene, pa asina por yega cerca di e 60 miyon florin cu Hulanda ta pidi pa recorta den cuido medico.

            E mandatario a reitera cu esaki ta hopi dificil pa cumpli cune desde tempo cu Hulanda a dicidi esaki, den pleno pandemia, y aworaki tambe. No obstante e situacion dificil, Hulanda semper a para riba su decision cu nan kier mira un recorte di 60 miyon.

            Minister Oduber a sigui splica cu den luna di November, Gobierno di Aruba a bay di acuerdo cu e contenido di e Landspakket, cual un parti di dje tambe ta toca e tema di cuido, cu ta e F3 cu el a menciona prome.

            E trayecto cu a sigui despues di e palabracionnan cu a keda hancra den e Landspakket, ta cu na Januari 2021 a duna e opdrach di haci e investigacion riba eficiencia y efectividad, y financiamento di cuido, na profesornan Hubbe y Bateburg.

            Na Januari 2021 tambe a institui un Comision Nacional di Cuido, pasobra mester corda cu e stakeholders na Aruba tabata di opinion cu tin diferente forma di yega na e 60 miyon y a base di esey a institui dicho comision, cual a haya como tarea tambe pa trece recomendacionnan dilanti, con nan ta pensa ta e mihor forma pa haci e reformanan den AZV.

            E mandatario a relata cu den luna di Februari, den un proceso di negociacion bastante largo cu Ministerionan di Salud, Deporte y Bienestar di Hulanda (VWS) Curacao y Sint Maarten, den cuadro di e reunionnan di ministernan di salud di Reino Hulandes, cu a tuma lugar prome y despues cu e pandemia a cuminza, un  di e puntonan di atencion tabata e deseo di e Ministerio di VWS, pa lanta un Asociacion di Hospitalnan, cu nan a yama “Dutch Caribbean Hospital Alliance” y den luna di Februari 2021, nan a firma e Beslisdocument. Minister Oduber a señala cu pa Aruba e tabata importante, pasobra e intencion di e DCHA ta pa nan cumpra remedinan hunto, entre e paisnan, pa nan por atende e pashentnan den e region aki mes.

            Minister Oduber a bisa cu un  di e puntonan di mas importante pa Aruba tabata, den cuadro di eficiencia y di reduci gasto, pa na tur momento logra haya bon servicio na un prijs reduci, cual Aruba ta hayando na Colombia, na e momentonan aki, pa asina por garantiza y hanker den e Beslisdocument, cu si otro paisnan ta ofrece Aruba bon calidad di cuido y na un prijs hopi economico, Aruba semper ta liber pa dicidi pa haci escogencia, na unda ta manda e pashentnan local.

            Pa e motibo aki gobierno a bay di acuerdo cu e Beslisdocument pa hancra esaki como articulo, cu na momento tin cuido mas economico y di calidad di servicio hopi halto, Aruba por haci e escogencia aki. Consecuentemente, na Juni 2021, e Comision Nacional di Cuido a entrega nan rapport y recomendacionnan, y despues, na Augustus a sigui otro opdracht cu a wordo haci pa un compania Hulandes, cu ta parti di e investigacion di profesor Hubbe pa determina kico ta e base zorg di nos pais y den luna di Maart 2022 e investigacion di eficiencia y efectividad di e profesornan Hubbe y Bateburg a wordo entrega, pendiente di un feedback di ministerio di salud riba e rapport aki.