Siberi Foundation ta presenta un programa di consciencia emocional na Aruba 

Wilga Zibel:

ORANJESTAD (AAN): Señora Wilga Zibel di Siberi Foundation, ta introduci na Aruba un programa di conciencia enfoca riba desaroyo emocional, basa riba 26 aña di investigacion, experiencia personal y dedicacion profundo pa bienestar di mucha.

   E programa a nace for di su propio buskeda. Tempo cu señora Wilga tabata mucha, el a sinti cu mundo tabata dificil di compronde y cu no tabatin guia pa maneha su emocionnan. E buskeda a conduci na e investigacion di con bida y e ciclo di bida ta funciona. For di e momento ey, esaki a bira su mision.

  Segun su investigacion, hopi problema di comportamento, manera agresion, adiccion, criminalidad y trastorno alimenticio, tin nan raiz den falta di comprencion y maneho di emocionnan manera miedo, rabia y tristesa. Señora Wilga a descubri cu ora un mucha siña mira emocion como señalnan importante cu ta guia nan na nan “ami” autentico, nan por biba un bida mas liber y consciente.

   E programa ta experimental, creativo y educacional. A traves di storianan yen di sabiduria di bida, material simbolico y hermentnan visual, muchanan ta siña no solamente reconoce nan emocion, sino tambe expresa kico nan tin mester. Muchanan di cuatro aña por reconoce seis emocion basico, y for di siete aña nan por identifica te 40 emocion diferente. Tur material ta adapta segun edad.

   Un parti esencial di e programa ta training pa adulto. “Muchanan tin mester di ehempel. Si un adulto no sa con e mes kier wordo mira of scucha, e no por ta un ehempel pa su yiu”, señora Wilga a bisa. P’esey e ta educa docente, profesional, mayor y tur hende cu kier haci diferencia den bida di mucha.

   Na centro di su filosofia tin e simbolo di “diamante” cu ta representa e balor igual cu tur persona tin, sin importa pais, color di cuero ni situacion economico. Tambe e ta uza e concepto di “un pida puzzle”: tur hende tin un luga unico y importante riba mundo. Ora nos balora talento di otro, harmonia ta surgi.

   Recientemente, señora Wilga a implementa su programa cu mamanan hoben na Aruba, unda participantenan a experencia cambio positivo den un tempo hopi cortico.

   Su mensahe ta cla: kibra e patronchi di generacionnan, fortalece conexion humano y contribui na mas paz riba mundo.