Investigado di Universidad di Aruba ta subraya e rol clave di ‘civil society’ pa logra cambionan duradero

ORANJESTAD (AAN): Durante e Common Good Conference dia 29 di januari, un docente y investigado di Universidad di Aruba a pone enfasis

riba e rol fundamental di civil society organizations, conoci tambe como NGOs, den fortalecemento di e bon comun riba Aruba.

Den su presentacion, Thais Franken a enfoca cu e bon comun ta mira hopi biaha como un concepto abstracto. Sin embargo, segun Franken, e realidad Arubiano ya tin numeroso ehempel concreto di bon practica y colaboracion exitoso entre NGOs y diferente actor den comunidad.

“Mi a mustra cu e bon comun no ta solamente un idea teoretico, pero un realidad cu ta existi ya den hopi iniciativa y trabou haci riba Aruba,” segun Franken.

E presentacion a enfoca riba e importancia di colaboracion entre organisacionnan comunitario, sector publico y otro stakeholder, como un manera efectivo pa logra cambio duradero. Segun Thais Franken, fortalecemento di e bon comun ta rekeri un enfoke colectivo y coordina, mas cu accion aisla.

Un punto central di su mensahe tabata e reto di pensamento a largo plaso. El a indica cu hopi institucionnan den sociedad ta forsa pa pensa y actua riba corto plaso, mientras cu e gran desafio ta pa inverti den stabilidad institucional pa futuro.

“Nos ta enfrenta e reto di pensa mas aya di e corto plaso, pa inverti den institucionnan fuerte cu por sostene e futuro di nos generacionnan,” Franken a enfatisa.

Segun e investigado, Aruba tin un base solido di orguyo nacional y compromiso comunitario. E reto pa futuro ta pa traduci esaki den institucionnan mas stabiel y resiliente, cu por carga e responsabilidad di desaroyo social y bienestar pa generacionnan cu ta bin.

Su aporte den e conferencia a contribui na e dialogo mas amplio riba con Aruba por sigui construi un sociedad cu e bon comun no ta solamente un ideal, pero un practica diario cu ta comparti pa tur.