Jurette Croes, PR di DVG, ta amplia:
ORANJESTAD (AAN)—Den e contexto di e proyecto (encuesta) Steps 2023, e relacionista publico di Departamento di Salud (DVG), Jurette Croes, a duna mas detaye tocante e investigacion aki, realiza hunto cu 'World Health Organization' y Oficina di Estadistica (CBS).
E dama a duna di conoce cu nan ta tene cuenta cu e personanan registra cu no tin transporte, vooral pa loke ta concerni step 3.
Un persona cu tin cu cumpli cu e step 3 (test di sucu y cholesterol) cu no tin transporte pa yega na e Departamento di Salud Publico, of na IBiSA, na San Nicolas, nan por indica esaki y e ora ey e encuestador lo percura pa e nurse pasa e siguiente dia, of kizas haci un cita pa ki dia e por pasa na cas di e persona pa haci e test di sucu y cholesterol.
Jurette a splica tambe cu e 5.120 persona registra ta dividi den full Aruba, pues no ta concentra, pues no ta concentra den un bario of region, y no ta enfoca riba edadnan jong of edadnan grandi. E 5.120 persona mester bay duna DVG un bista amplio di con e situacion ta na Aruba.
Croes a señala cu e informacion aki lo wordo procesa hunto cu WHO y Epidemiologia di Aruba, y e meta ta pa salubridad publico sa précis, kico ta e conducta, custumbernan y e trends nobo cu den e ultimo temponan a drenta nos poblacion, cu kizas ta causando cu hendenan ta hayando malesanan no transmisibel aworaki caba, of por ta, den futuro.
El a pone como ehemplo e vaping. E ultimo biaha cu Steps a tuma lugar na Aruba tabata na 2016, y e tempo ey no tabata conoci e vaping riba e isla, pero awo si. Pesey ta hopi importante e tipo di investigacion aki, cu no ta wordo haci frecuentemente, pa e ora ey sa precisamente cual ta e factornan di riesgo cu ta drenta den e populacion y cu por tin efecto na largo plazo.
