Si no bin solucion pa trahadornan di De Palm Tours e ora lo intensifica accionnan

Ryan Giel di F.T.A.:

ORANJESTAD (AAN): Director di Negociacion di Federacion di Trahadornan di Aruba (F.T.A.), señor Ryan Giel, diamars mainta tabata presente na e accion di trahadornan di e compania di De Palm Tours. Ya den mas di un ocacion F.T.A. a hiba dialogonan riba problemanan existente tanto den e departamento di bus como esun di 4x4.

   Señor Giel a splica cu De Palm Tours no ta cumpli di acuerdo cu e CAO cu a firma dos aña pasa y e compania ta hunga wega y di otro banda ta purba haci cambionan den e CAO cu no ta corecto. “Na e momentonan aki, personalmente ami di F.T.A., a dicidi cu no lo bay tin mas dialogo y a cuminsa cu accion, dependiendo riba cambio di actitud di gerencia di De Palm Tours. Actualmente nan no ta scucha trahadornan y ta tuma decisionnan unilateral sin consulta cu e trahadornan y ta haci movecionnan cu ta afecta e trahadornan”, señor Giel a remarca. 

   Señor Giel a enfatisa cu e siguiente paso cu lo tuma ta bay Corte pa falta di cumplimento di e CAO si no yega na un solucion via dialogo pa sali di e situacion aki. Pa awor tin paro di trabou mientras ta wak si lo yega na un solucion prome cu tuma e siguiente paso.

   Segun señor Giel, trahadornan di De Palm Tours ta expertonan trahando pa hopi aña y ta duna bon servicio. E proposicion pa para trabou ta pa gerencia comprende cu si sigui asina cu nan maneho, lo intensifica e paronan. Esaki por conduci cu automaticamente ta bay Corte pa e puntonan cu no ta di acuerdo cu n’e. “Mi ta dispuesto pa dialoga un biaha mas pero lo no keda bin purba dialoga sin cu ta yega na solucion. Mester bin un solucion satisfactorio aworaki of e accionnan lo intensifica”, señor Giel a enfatisa.