Minister Geoffrey Wever
ORANJESTAD (AAN): Minister Geoffrey Wever a anuncia cu prome di september 2025 ta bira un dia importante pa Aruba su sector primario. Famia comerciante di e compania PokPok den un cooperacion unico hunto cu banco local, Gobierno di Aruba a duna di su parti pa e compania logra ricibi un tereno na San Nicolas pa e expansion di produccion comercial di webo. Cu esaki e compania local Pok Pok ta dal un paso esencial pa seguridad alimenticio pa Aruba pa loke ta trata produccion comercial di webo di galiña.
Maneho pa Sector Primario tin como fundeshi pa contribui na seguridad di cuminda y desaroya un sector resiliente y robusto; y tin como ambicion pa corto y largo plaso, entre otro hisa e produccion comercial. Pa por logra esaki di acuerdo cu Programa di Gobernacion AVP-FUTURO 2025-2028 lo duna prioridad na otorga e terenonan necesario y agilisa e proceso pa subi produccion comercial di webo di galiña y agricultura.
E cooperacion aki entre sector priva y sector publico ta sirbi como ehempel y inspiracion pa otronan.
September ta net un aña cu un werkgroep cosistiendo di DIP, Santa Rosa y DEZHI a wordo institui pa pusha proyectonan importante manera esaki pa hisa produccion comercial di webo di galiña. Segun informacion di Departamento di Asunto Economico na 2024, di e total di webo consumi, 14.2 porciento ta produccion local. Cu expansion di un tereno di 30 mil ㎡ e meta den e prome fase ta pa yega 60 porciento di produccion local.
“E meta di nos ministerio ta pa nos yega na 100% produccion di webo local, pues cu Aruba no mester importa webo mas”, segun Minister Geoffrey Wever.
E cooperacion entre sector priva y sector publico ta un instrumento importante den ehecucion di e vision pa hisa e produccion comercial di webo di galiña. E tipo di partnership aki ta duna resultado concreto pa desaroya agricultura comercial den un pilar economico fuerte segun minister Geoffrey Wever.
Minister Geoffrey Wever ta gradici tur instancia, departamentonan, persona y specialmente famia Kock pa e trabounan duro, e perseverancia y confianza den produccion comercial y local di webo di galiña pa asina duna un contribucion na seguridad alimenticio y desaroyo di agricultura comercial.
