Opinion di un empleado publico: - ORANJESTAD (AAN) – E expresion cu por lesa como cabes di e articulo aki, a bin di un empleado publico, cu despues di a sigui e debate politico y pre-electoral di Diahuebs anochi,
a saca como conclusion cu nada di e Landspakket cu Hulanda a pusha Aruba cune, no por wordo negosha.
Di un of otro manera, tur e lidernan politico a acepta cu e Landspakket tey pa keda y pa cumpli cune, y un di e exigencianan ta bolbe baha salario di ambtenaar cu 10%, y riba tur esaki ta bin un impuesto di 12.5% adicional na e BBO.
Con por pretende cu e trahadornan publico, cu tambe tin famia pa cria, incluso hopi mama soltero cu tin cu asumi tur e gastonan di cas, pasobra hasta den caso di divorcio, e suma di alimentacion, cu huez a fiha pa e tata duna na cada mucha, ta masha abao mes.
Den e reglamento laboral pa ambtenaarnan nan no tin derecho pa nan haci negoshi, of busca un side job. “Si no por evita un bahada mas di salario di e trahadornan publico, anto laga nos of haci negoshi, of busca un side job; laga nos haya e placa otro caminda” e empleado publico a expresa.
E empleado publico aki a warda hopi discrecion cu su identidad, pero e sa cu esaki ta tambe e pensamento di mas ambtenaarnan, cu ta sinti comosifuera nan ta wordo culpa di tur e problemanan financiero di Aruba, incluso nan ta aportando un fondo di solidaridad pa yuda esnan cu a keda sin trabao for di sector priva, pero ainda nan no ta bon, y na dado momento ta parce hasta cu nan tin falta cu na Aruba tin Covid-19.
