ORANJESTAD (AAN) – Señora Astrid Thiel, Manager di OAA (Openbare Avondleergangen Aruba), tabata presente den e conferencia di prensa di SEPPA,
unda e tambe a hiba palabra, despues cu e Secretario General di e Sindicato, Magaly Brito, a papia.
Thiel a trece dilanti Minister di Enseñanza mester duna mas aclaracion tocante di con e rapport cu a menciona, ta existi. Prome cu e actual directiva tabata tin un stichting forma pa docentenan di OAA, y e directiva anterior tambe tabata tin di haber cu e stichting aki.
E minister su plan tabata pa independiza OAA, cu e stichting aki, na 2019, siendo cu e no por a independiza un scol publico, manera e decision cu a wordo tuma na 2018 den Parlamento.
Pero ora cu e mandatario a sigui cu esaki, pero un bez cu el a ripara cu e bestuur cu el a nombra den e Stichting no kier a sigui traha cu e stichting aki pa OAA, sabiendo cu na Notario nan a wordo informa cu dicho stichting no por tabata tin un existencia bao un scol publico, pasobra un scol publico no por tin existencia.
Pues, tur loke por a sosode cu por tabata tin malversacion of fraude, cu e minister por a menciona, no ta algo cu ni por a existi pasobra OAA no por tin un stichting bao di dje, unda cu por tin fraude y un minister no por tin control.
Thiel a reitera locual Magaly Brito a bisa, cu e subsidio cu OAA ta ricibi, como scol publico, ta bao maneho di e Departamento DPS (Dienst Publieke Scholen), nan ta controla e subsidio cu OAA ta ricibi a genera placa, pero na momento cu no tabata tin e cuenta di banco mas, cu stichting tabata tin, eynan e problema a bin. OAA a pidi e minister pa duna nan un cuenta bancario, pero e no a duna nan esaki. E manager di OAA, a splica cu nan ta duna curso y opleiding, y e studiantenan kier haci nan pago, y como cu Minister no kier a coopera pa OAA haya cuenta di banco, el a acerca Stichting EPB, pero nan a bise cu nan no tuma cursonan, solamente opleiding, y cu e no ta bay tuma encargo di scol publico.
Asina tin hopi trayectoria cu no a bay bon, y na momento cu e Minister a haya un advies negativo, cu no por pasa un scol publico bao un stichting, e ora ey el a dicidi pa traha un NV pa E POR hustifica su plan, pa pasa OAA bao SEPB.
Thiel a agrega cu locual a sosode despues, cu e minister a bisa cu OAA a haci uso di e facilidadnan di EPB, ta berdad, pasobra scol ta un edificio di gobierno cu por haci uso di dje den dia, atardi y anochi.
OAA tin un existencia di 66 aña y a demostra pakico e ta pa pueblo, y como scol pa adulto e ta dunando educacion formal y informal, y e no ta solamente pa “drops out” manera e minister ta menciona.
OAA tin diferente studiante cu ta caba Colegio EPI, cu a bay MAVO of HAVO, of cu tin posicionnan clave den nos comunidad.
Pues, e minister no por bin bisa cu e ta solamente pa “drops out”. OAA no ta un opvang scol. Astrid Thiel a subraya cu e scol aki ta duna oportunidad pa ken cu ta desea haya mas conocimento di cierto materia, sea pa haci cierto materianan, of pa un curriculum, of pa haci cursonan cortico sea pa mehora of pa haya un trabao, OAA ta duna tur esaki sea merdia of anochi.
Astrid Thiel ta lamenta cu minister Lampe ta troce e berdad, y e kier ta hopi claro den esaki, y OAA ta brinda comunidad tur loke nan por pa eleva nan conocemento.
