ORANJESTAD (AAN): Dr. Wilmer Salazar, consehero di Departamento di Salud y miembro di Crisis Team tabata den entrevista cu Aldrich Croes na Hits100 FM unda el a papia riba Covid-19.
El a remarca c'un persona cu ta wordo contagia cu omicron ta haya e virus den e sistema respiratorio superior, kiermen garganta y nanishi, pero esey no ta nifica cu e persona no lo por haya un infeccion den su pulmon (manera tabata e caso di Delta).
Esnan cu ta haya omicron, e sintomanan por presenta parecido na un griep. Por haya un kishiki den garganta (tos), dolor di cabes, fatiga, verkoud, nistermento, generalmente.
Pa loke ta e vacuna, esaki ta yuda neutralisa e virus. Pesey ta importante pa vacuna, a remarca.
E bentaha di tin e 'booster-shot' ta cu e cantidad di celulanan di proteccion ta bay yuda cu e infeccion lo por keda modera y no uno grave, segun e experto.
El a duna di conoce tambe cu esnan cu ta drenta hospital ta keda rond di tres dia. Sinembargo, ainda tin hendenan cu tin cierto condicionnan di salud cu e virus por afecta nan mas, principalmente si nan no ta vacuna.
Pa locual ta e complicacionnan, por sosode cu e virus ta afecta e sistema respiratorio y eventualmente por causa infeccion di pulmon y pesey mester keda atento. Pesey un persona cu sintomanan mester tuma contacto cu docter di cas den caso di sinti hopi malo.
Refiriendo na e tema di e 'zelf test', docter Salazar, a indica, cu esaki mester haci'e den e prome 5 dianan cu e sintomanan presenta. Sino e lo por resulta den un falso negativo. E test aki ta di 'alta tecnologia', pero no asina sigur manera un PCR Test.
El a laga sa tambe cu Omicron ta afectando e muchanan pasobra nan no ta vacuna mescos cu e grupo di adultonan, cu ya caba tin nan vacuna.
E presentacion di sintomanan den muchanan no ta asina severo manera tabata tin cu Delta. E por pasa manera un griep leve of modera. Pero toch mester keda atento na e sintomanan, a enfatisa.
E hendenan cu a haya nan vacuna no ta hayando 'lung covid' (efectonan posterior despues di a haya e malesa).
Dr. Wilmer Salazar a finalisa bisando cu Delta ainda ta circulando den un porcentahe mas chikito. E no a bay. E tey ainda. Y tambe tin gama y alfa. Bo no sa ki dia bo por hay'e. Pesey mester cuida.
A bisa cu awor, por ehempel, mester bay haya sa si e hendenan cu a wordo hospitalisa den ICU si nan a haya omicron of delta y e motibo cu nan a bira grave.
