Luis Chong, Hefe di GKMB cu yamada na comunidad:
ORANJESTAD (AAN)— Luis Chong, Hefe di Gele Koorts Muskieten Bestrijding (GKMB), den entrevista cu DIARIO a declara cu enberdad nan ta hayando hopi yamada tocante molester di sangura loke a premira, mirando e cantidad di yobida di e ultimo simannan.
Tambe a constata cu hopi hende no ta teniendo nan cura limpi, y ademas hopi persona ta muha nan mata cu awa den hemchi, bari of otro artefacto y despues di un siman GKMB ta haya un brote grandi di sangura den e barionan.
“P’esey nos ta hayando hopi yamada di e casnan. Nos ta bishita casnan cu tin problema y nos ta constata cu den e cas mes por tin tire benta den cura, bleki bashi, hemchi cu ta coi awa, y e problema nos mes ta creando rond di nos cas.
Nos ta haciendo nos best atendiendo e yamadanan, pasobra nos no kier laga ningun hende afo door di e problema, pero e idea no ta cu nos ta bin haci cura di hende limpi. Esey mester wordo haci door di nos comunidad mes, y esey nos ta pidi tambe ayudo di henter nos comunidad. Pesey mi ta pidi pa cana den bo cura wak si tin awa para, y si bo tin un tire mi ta 100% sigur cu bo tin un criadero. Si bo spaar tire pa algun motibo, pone esaki den un luga cu aire seco bao di dak, den garashi. Pero si e ta den bo cura y e ta coi awa, bo tin un criadero den bo cura”, Luis Chong a remarca.
El a reitera personanan cu si tin tire, of otro artefacto unda cu awa di yobida keda para, pa por fabor deshaci di esakinan mas pronto posible, si no despues di un par di siman lo tin e mesun problema atrobe.
GKMB tin comunicacion cu City Inspector, y ora cu nan ta topa cu problemanan grandi ta pasa esakinan door, y tin varios caso cu City Inspector ta soluciona, y nan ta constata cu tin areanan cu hopi desperdicio tira. Hopi hende ta kere cu esaki ta den mondi pero den e centro mes di Oranjestad, den e area di Noord, meymey di e casnan tin lugarnan unda hendenan ta tira nan sushi, y esaki ta crea un problema grandi.
