Prinses Beatrix a logra di mira dos shoco tambe na Spaans Lagoen

ORANJESTAD (AAN): Tabata un honor pa Fundacion Parke Nacional Aruba duna bon bini na Prinses Beatrix na e area protegi di Spaans Lagoen.

   Nan tabata tin un oportunidad di oro pa introduci Prinses Beatrix na diferente proyectonan di conservacion cu ta andando incluyendo e proyecto ‘Turning the Tide’ cu ta un proyecto funda pa EU su programa di RESEMBID cu tin como meta e restauracion di mondinan di mangel y rifnan di coral na Aruba. Nan por a mustra prinses 1 di e 400 MARS ReefStars cu FPNA hunto cu asina hopi boluntario a traha riba dje y tambe MOSES reefs cu por cierto ya a worde poni den areanan designa den Parke Marino Aruba.

   Tambe nan tabata tin e oportunidad di papia cu e prinses tocante e Programa di Conservacion di Shoco, y por bisa sin duda cu e prinses ta stima Shoco di Aruba. Bunita tabata cu e prinses por a wak no un, sino dos Shoco den nan habitat natural na Spaans Lagoen.