Luis Chong, Hefe di GKMB:
*Den cada cas mester percura pa no tin criadero!
ORANJESTAD (AAN) – Den entrevista cu señor Luis Chong, Hefe di Gele Koorts Muskieten Bestrijding (GKMB), a comenta cu tin hende ta yama e departamento pidi pa nan pasa cu e truck pa spuit den bario, debi na e cantidad di sangura cu tin rond, locual e departamento no ta haci mas.
Chong a splica cu no solamente aki na Aruba, pero den henter Caribe, Europa y Merca, esaki tabata e manera di traha, pero como cu Ciencia no ta para keto a bin ripara cu e productonan cu ta wordo uza ta dañino pa e medio ambiente. El a menciona, como ehemplo, e producto Malathion, cu nan tabata uza antes pa spuit. Pero un bez cu nan tabata mata e sangura cu ne, tabata mata tambe tur abeha cu tin den bario.
Chong a splica cu na Aruba tin hopi hende ta cria abeha awendia, por ehemplo na Noord y Santa Cruz, y no ta husto cu hendenan ta laga hemchi cu awa para y genera criadero, y GKMB tin cu pasa spuit cu e producto menciona anto mata tur abeha y otro insectonan djis pa elimina sangura.
“Nos mes por haci esaki djis si nos pone nos granito di arena”, Hefe di GKMB a expresa. El a agrega cu mayoria di agricultornan cu ta yena awa den bari y GKMB tin contacto mutuo.
“Constantemente nan ta bin cerca nos pa conseho, pa productonan cu nan ta uza, y nan ta basta bon informa, nan sa y ta y ta yudando nos pasobra nan mes ta bin busca informacion y producto, con pa combati esaki. Mas tanto nos tin problema cu hende cu ta coi un of dos hemchi rond di cas, cu nan ta kere cu ora awa stop di yobe nan ta bay use, pero mientras tanto awa ta sigui yobe y e hemchi ta cria sangura”, Luis Chong a señala.
El a bisa cu GKMB ta hopi contento cu hopi hende ta yama nan pa conseho of ta acerca nan, puntra ki producto nan por uza pa no daña nan mata of si nan tin bestia rond di cas, ta contact nan pa informacion.
“Nos ta un grupo grandi na GKMB, pero nos no por ta tur caminda tur ora, y un bez cu nan contact nos cu mil amor nos ta duna conseho kico nan por haci pa yuda nos combati e sanguranan”, Luis Chong a señala.
El a agrega cu e problema mayoria parti no ta rond di e hendenan nan cas, pero ta e problema di Saliña y nos ta bezig cu esaki, y si en caso cu ainda, despues di un siman tin hopi molester, podise ta un otro cos, anto por yama GKMB.
