‘Si bo ta confronta cu problema di salud mental bo mester sa cu bo no ta bo so’

FADA a lanza video nobo riba salud mental:

ORANJESTAD(AAN): Diamars riba Dia Internacional di Salud Mental FADA a tene un conferencia di prensa, durante di cual preventive medewerker Rubiella Toppenberg a bisa cu ta importante pa duna e dia aki un reconocimento, pasobra salud mental ta algo hopi importante den nos comunidad.

“FADA tey awe hunto cu Stichting Hunto y Respaldo pa duna importancia na e dia aki”.

 FADA pa e dia special aki ta bay lanza un video pa manda un mensahe hopi fuerte pa comunidad di Aruba, pa bo sa cu si bo ta pasando den cualkier situacion door di cual bo no ta sinti mucho bon, nunca no ta bo so, segun Toppenberg.

El a sigui bisa cu FADA su trabao pa loke ta salud mental, ta traha riba prevencion.

Pesey a crea un video den cual diferente artista local ta duna un mensahe na tur esnan cu ta pasando den momentonan menos dushi.

“Nos sa cu salud mental ta un bataya cu hopi hende ta wordo confronta cune y e ta un bataya tin ora largo, pero  ta hopi importante pa bo sa den e proceso aki cu bo no ta bo so y cu tin diferente ‘stakeholder’ na Aruba cu ta dispuesto pa brindabo e ayudo”, segun Toppenberg, kende a sigui bisa cu importante ta pa bo acepta cu tin un problema y cu ta importante pa busca ayudo pa esaki.

Toppenberg a bisa cu despues di lanza e video e ta spera cu comunidad comparti esaki, pa asina e yega cerca tur esnan cu quizas ainda tin miedo di duna di conoce cu nan ta confrontando retonan mental.

El a indica cu e tipi di mensahenan aki ta hopi importante, pasobra na Aruba tin bastante hende cu tin problema di salud mental y esaki ta den tur categoria di edad.

“Den e trabao cu nos ta haci nos a ripara cu salud mental no tin edad”.

E ta cuminza den edadnan hopi hoben, unda cu problemanan di famia na cas por causa mucha pa wordo confronta cu cierto trauma y desbalance pa loke ta nan salud mental.

“Un di e problemanan cu nos a nota cerca nos hobennan ta cu nan tin problema cu nan auto estima”.

Hopi di nos hobennan ta biba riba social media y ta biba bao di un presion enorme y e presion aki tambe ta pone cu nan ta crea un desbalance cu nan salud mental.

Hopi hoben ta bataya ansiedad of depresion y hopi biaha nan ta biba cu esaki, sin sa cu e tin nomber, segun Toppenberg.