Magaly Brito, Secretario General:
ORANJESTAD (AAN) — Sindicato di Empleadonan Publico y Priva (SEPPA) tabata tin un encuentro cu Minister di Enseñanza pa duna siguimento na un reunion cu nan tabata tin anteriormente. Secretario General di SEPPA, señora Mgaly Brito, den entrevista cu DIARIO a duna informacion tocante e tema aki.
Brito a bisa cu durante e discusion cu nan tabata tin cu e minister, nan a bin ta elaborando riba e hecho cu hopi docente no tin nan documentonan na nan lugar, por ehemplo di nan nombramento di vaste dienst.
En principio nan ta den trabao fiho, pero lo corecto ta pa gobierno como dunador di trabao, duna nan un Decreto Ministerial (MD). Tempo di e Ministernan anterior tabata tin hasta un rapport cu a sali unda cu tabata mustra tur e deficiencianan cu tabata tin, den e departamento cu ta atende scolnan publico.
Den cuadro di esaki nan a keda palabra, y e mandatario a indica na SEPPA cu e lo institui diferente comision pa atende cu e problemanan aki, pa percura pa, a corto plazo, asuntonan di docente keda regla debidamente. “Pero banda di esaki tin tambe e asunto di werksternan cu ta traha den scolnan publico, na unda cu cada biaha nan contrato ta keda alarga na un aña y esaki no ta corecto. Den cuadro di esaki tambe a keda palabra cu nos puntonan lo keda cla aworaki, den luna di October, y e ora ey, mi ta bisa cu pa un tempo sigur, nos lo no ta cada rato cu e problema aki” Magaly Brito a indica.
Magaly Brito a agrega cu e fayonan of limitacionnan aki di un dunador di trabao, pa cumpli debidamente cu su trahadornan ta hopi di lamenta, trahadornan mester di nan seguridad di trabao y no por ta asina cu un dunador di trabao keda sin cumpli.
El a subraya cu si algo pasa cu un docente cu nan mester defende nan mes, nan mester tin nan documentonan di trabao na alcance di nan man. Brito a menciona tambe e demotivacion cu tin bao e docentenan na Aruba, pa e hecho cu e sistema salarial ta hopi discriminatorio, pero tambe nan ta bisa cu nan ta keda stanca. “Sin lubida e peso di trabao cu tin den enseñanza, cu ta birando cada dia mas dificil, y sigur cu e tipo di hobennan cu awendia cu tur nan problemanan y frustracionnan cu nan ta hiba nan na scol y nan ta haci cu dificilmente nan por sigui den enseñanza normal, cu cantidad di klasnan grandi, etc. Ta discusionnan cu cada biaha bo ta trece dilanti y bo kier soluciona nan”, Magaly Brito a señala. Finalmente Magaly Brito a bisa cu e ta spera cu berdad den e luna di October aki, e grupo di docente por haya nan vaststelling.
