E base di acusacion contra Benny ta e conclusion di un analisis
*Benny ta wordo acusa di a abusa di su puesto como Ministro
*Si Evelyn a hunga Ministro na 2004, na 2009 AVP mester a actua
ORANJESTAD(AAN)—Tabata Jan de Ruyter cu a bira conoci na Aruba pa e cantidad di caso cu e ta descubri y trece den Corte, cu a descubri cu tabata tin algo robez cu e forma cu terenonan ta wordo otorga durante temporada di Benny Sevinger como Ministro.
El a haci su investigacion cu el a entrega na autoridad, separa di partido MEP cu tambe a entrega keho.
Esaki tabata nacemento di e caso Avestruz cu a haci cu awe Benny Sevinger ta acusado den un caso den Corte.
Na momento cu autoridad a detene Benny Sevinger na 2021, el a acusa Evelyn Wever-Croes y a entrega un keho contra Evelyn Wever-Croes kende lo a comete segun Benny Sevinger mes actonan pa cual Benny ta wordo acusa.
Prome cu eleccion 2021, Evelyn Wever-Croes a bira centro di atakenan politico den cual el a defende su mes.
Awe na momento cu Benny Sevinger mester enfrenta Huez, e ta bolbe cu su acusacion cu na 2004 Evelyn Wever-Croes tambe lo a haci su mes culpabel di loke awe ta acusa su persona di a haci.
Na prome momento nos no a considera henter e storia digno di atencion pero como cu e ta sigui y sigui na un momento cu Aruba mester di su atencion a sigui atende cu su recuperacion, nos mester aclarea un que otro.
No ta posibel pa Evelyn Wever-Croes a comete mes delito cu Benny Sevinger pa un motibo simpel.
E acusacionnan contra Benny Sevinger ta basa riba e forma cu Benny Sevinger lo a atende cu tereno di Pueblo ora e tabata Ministro.
Benny Sevinger ta wordo acusa di a uza e Puesto cu Pueblo a pone den su man pa defende interes di Aruba, como un fuente di entrada pa su partido y na bienestar di su “family and friends” cu ta algo cu Evelyn Wever-Croes no por a haci na 2004 ora e tabata un abogado.
Pa por haci loke Benny Sevinger a wordo acusa di a haci, un persona mester ta Ministro.
E acusacion contra Benny Sevinger ta papia di abuso di su funcion como Ministro encarga cu Tereno, di a participa na crimen organisa den cual como Ministro e tabata tin un lugar central, di a acepta soborno y di a laba e placa di e crimennan aki.
Evelyn Wever-Croes na 2004 no por a acepta soborno como Ministro, pasobra e no tabata Ministro.
E no tabata tin den su man e decisionnan cu un Ministro por tuma pa firma pa entrega di tereno di Pueblo na ningun persona.
E acusacionnan di Benny Sevinger tabata basa pues riba e hecho cu como Ministro el a abusa di su funcion y poder pa parti tereno di Pueblo.
Awor ta surgi e pregunta mas serio. Si na 2004, Evelyn Wever-Croes a disfrasa na Ministro pa comete e crimen, Benny como Ministro encarga di Tereno di Gabinete Mike Eman den e dos periodonan di Gobernacion 2009 te 2017 no a ripara cu tabata tin wega cu tereno di Gobierno?
Pakico prome cu 2017, ora Benny Sevinger como Ministro tabata tin bienestar di Aruba den su man, no a actua?
Autoridad tin e acusacionnan di Benny Sevinger den nan man segun e ta bisa. E caso cu e kier lanta contra Evelyn no por ta mescos cu e acusacionnan contra loke el a haci pa e simpel motibo cu Evelyn no tabata Ministro na 2004, prome cu Benny Sevinger a wordo encarga cu e deber pa vigila kico a pasa prome y despues di 2000 cu terenonan di Aruba.
