Showroom di Aruba Fashion Week 2025 a conoce un exito creativo y comercial sobresaliente

ORANJESTAD (AAN) E seccion Showroom di e Aruba Fashion Week (AFW) 2025 a destaca como un di e elementonan di mas fuerte den e programa di e aña aki,

ofreciendo un experiencia integral y hopi interactivo pa local, huesped di resort, profesional di e industria y fanaticonan di moda.

   Organiza na e tienda di Red Sail ubica na JOIA Aruba by Iberostar, e Showroom tabata habri durante henter e fin di siman y a yega su punto mas fuerte diadomingo despues di e desfilenan riba pasarela.

Diseña como un espacio pa conexion directo, e Showroom a invita pa bay di djis wak e desfile pa topa diseñadornan cara a cara, tende e storia tras di nan marca y compronde miho e proceso creativo, material y inspiracion. E interaccion personal aki a crea un ambiente acogedor.

   Un elemento clave di e Showroom tabata e invitacion haci na boutique y tiendanan local. Doño y cumpradornan por a papia directamente cu diseñador, samina e producto di cerca den un ambiente relaha pero profesional. E encuentronan aki a fomenta combersacion riba colaboracion potencial, representacion y oportunidadnan pa futuro, fortaleciendo e rol di Aruba Fashion Week como un brug entre talento creativo y e sector comercial.

   Nancy Maya, responsabel pa coordinacion di e Showroom pa Aruba Fashion Week, a enfatisa su balor: “E berdadero exito di e Showroom di e aña aki tabata e calidad di e conexionnan cu a crea,” Maya a bisa. “Wak hende intercambia idea, siña for di otro y forma relacion ta exactamente loke nos ta aspira. Diseñadornan a bay cu sensacion di apoyo y cumpradornan cu un comprension mas profundo di e marcanan y e hende nan tras.”

  Como parti integral di e programa anual di AFW, e Showroom ta sirbi su mision di presenta talento nobo, fomenta interaccion y stimula crecemento profesional den e industria di moda.

   Aruba Fashion Week ta expresa su sincero agradecimento na gerencia y personal di Red Sail Sports, na tur diseñador participante pa nan confianza, y na tur cu a contribui pa haci e Showroom 2025 un gran exito. Te otro aña.