Shoco Legends a laga tur hende goza durante e Bike Rally Scavenger Hunt

Participantenan mester a busca scorpion y hasta bichi bibo

ORANJESTAD (AAN): Diasabra den oranan di anochi, a cuminza cu e di dos evento di Shoco Legends Bike Rally Scavenger Hunt, organiza pa Shoco Legends Aruba Aruba B.C.   E salida tabata for di Baru Lounge na Palm Beach.

   Por a mira riba cara di e.o. Jairo Alvarez cu el a keda contento cu e reaccion masal.  El a bisa cu despues di 3 aña nan ta organizando e evento aki atrobe.

   E actividad a conta cu varios post, y weganan divertido unda tabatin hopi reto!  Mestres a busca 10 drol di cabrito, bichi bibo, traha un figura di hende cu un taki di mata, saca potret di hendenan cu pia den halto na altura di Faro di California.

   E evento tabata habri pa tur Bikers e anochi ey.  DIARIO a nota cu e.o. nan mester a busca tambe un brassiere color cora, un longplay, bril di solo cu rand blanco, un girasol, handschoel geel, bandana di un partido politico, un banchi di concierto, un condon supla, un casuela, korki, plachi di number, etc.

   Cantidad pa cada grupo ta maximo 6 persona cu Bike, y aki bo por uza cualkier combinacion possible, pues 6 Bike cada un cu un persona, of 3 Bike cada un cu dos persona.  Cada grupo mester a inventa un nomber, y tambe nombra un hende como nan capitan.