RIO DE JANEIRO: Un homber di Brasil a wordo interna na un Hospital,
despues cu e mes na cas a trata di haci un cirugia na su nanishi, siguiendo instruccion medico cu el a mira riba un video poni riba YouTube.
Den su meta pa mehora su apariencia fisico, e homber no a usa instrumento di cirugia necesario. Pero el a aplica anestesia veterinario, alcohol di 70% pa limpia e zona cu el a bay corta, y a finaliza tur cos cosiendo e herida cu un hilo cu ta reabsorba su mes, y superbonder. Pa colmo e no a limpia sanger cu a mancha su nanishi, “pa no habri e heridanan”.
Unavez cu el a wordo hiba Hospital, e homber a haya atencion medico urgente pa evita infeccion, y tambe nan a dune yudanza sicologico. Mas laat nan a lage bay cas pa recupera.
Asina ta sali na cla, cu e desconocemento y e stereotipo cu e tipo di operacion estetico aki a genera cerca hendenan cu kier luci cada dia mihor. E videonan poni riba YouTube ta mustrabo con pa haci bo nanishi mas chikito, y esaki a pone autoridadnan awor na alerta.
E specialistanan a bisa cu e tipo di practica aki no ta djis ineficaz, sino tambe peligroso, como cu nan por genera complicacion severo pa e pashent, e.o. infeccion pisa, blokeo di e canal di nanishi, y hasta bo por bay den shock.
