ORANJESTAD (AAN): Sharline Koolman di DVG Diahuebs durante un conferencia di prensa a papia riba e tercer vacuna contra COVID-19.
El a splica cu esaki no ta wordo considera un asina yama ‘Booster shot’, sino un tercer vacuna di un serie di vacuna.
“Tin vacuna unda cu bo ta haya uno y e ta cubri pa bida largo, otro pa tanto aña etc”.
Pa loke ta COVID-19, na prome instancia a pensa cu dos vacuna lo ta suficiente pa duna e base di proteccion, unda cu despues di un aña bo ta duna un booster pa duna e sistema inmunologico mas forza, segun Koolman.
El a splica cu den e caso aki, personanan cu tin un sistema inmunologico abao of comprometi, lo tin cu haya e di tres vacuna.
Ta personanan cu por ehempel a haya nan dos vacunanan caba, pero tin cu tuma chemoterapia despues di esey.
E chemoterapia ta kibra funcionamento di e dos vacunanan, door di cual un tercer vacuna ta necesario, segun Koolman.
El a splica cu na Aruba a calcula cu tin 1000 pa 1500 pashent cu ta cay den e categoria aki y pesey via nan docter di cas of specialista e personanan por haya un receta cu cual nan ta presenta na e centro di vacuna na DVG, pa asina ricibi nan vacuna.
“Pa e persona cu a ricibi su di dos vacuna den menos cu 1 luna, e tin cu warda 1 luna pa e por haya e di tres vacuna”.
Koolman a duna un ehempel di pashentnan cu ta cay den e categoria menciona, esta por ehempel pashentnan menos di 2 aña pasa a ricibi un transplante di 'been merg' of un tratamento cu stem cell.
Tambe pashentnan cu a ricibi tratamento pa un malesa maligno y tur pashent cu a ricibi chemoterapia na 2021.
Pashentnan cu cierto problema di riñon cu ta bao di tratamento di un specialista tambe ta cay den e categoria aki.
E pashentnan cu ta tuma dialisis tambe ta cay den e categoria aki, como tambe esnan cu a ricibi un transplante di riñon y personanan cu a haya tratamento cu un medicina cu ta baha inmunidad.
“E specialistanan medico y docternan di cas ta na altura di kendenan ta e pashentnan aki”.
Nos a reuni cu nan caba y nan sa cua ta e pashentnan cu mester haya e di tres vacuna, segun Koolman.
