PHILIPSBURG: Tur pasahero, sea local of turista, y cu a wordo completamente vacuna segun e lista d vacunanan aproba pa RIVM di Hulanda y World Health Organization (WHO),
lo no mester di haci un Covid-19 Test pa por drenta St. Maarten entrante Dialuna 1 di November 2021.
Ministro di Salud Publico Omar Ottley a anuncia esaki durante un conferencia di prensa di Conseho di Ministronan. El a bisa cu esaki ta algo cu e Ministerio a bin ta vigilando pa algun tempo, y cu investigacion y resultadonan proba, a dicidi na bay den e direccion aki.
“Investigacion a mustra cu e capacidad di virus di un persona completamente vacuna y cu a wordo contagia cu Covid-19, ta bira menos hopi mas rapido compara cu un hende cu nunca a haya vacuna. Esaki nifica cu aunke tabatin algun man yen di casonan severo di hendenan completamente vacuna, e chens cu e hendenan aki ta plama e virus of bira seriamente malo ta tremendamente abao,” Ottley a bisa.
Ottley a indica cu e vacuna ta permiti bo curpa pa combati e virus unavez cu e infeccion ta move for di bo nanishi pa e adernan di sanger. Malestar severo ta wordo preveni door di vacuna bo mes, ya cu e ora bo curpa lo ta mihor prepara pa combati e virus.
Tambe ta bay desaroya un Covid-19 Recovery Digital Certificate (DCC) cu ta permiti hendenan registra nan contagio di pasado y mustra asina prueba cu nan a haya inmunidad natural.
Pasaheronan cu no ta vacuna, lo tin di haci tur e proceso di haci un PCR Test di Covid-19 prome cu nan yega St. Maarten.
