Shannon Vullings di Aruba a obtene titulo maximo di ‘Miss Petite Tourism World 2026’

Gen Ras a sali 1er finalista di Señora Turismo Mundial 2026

ORANJESTAD (AAN): E certamen di Miss Tourism World ta un certamen internacional cu a cuminza na Aruba, y cada aña ta tuma lugar na Aruba.  E biaha aki pa 2026, e organisadornan a “cambia” e pais unda e certamen ta socede, y a bay haci esaki na Punta Cana, na Republica Dominicana.

   Dos candidata a bay representa Aruba na e certamen.  E docente di scol Gen Ras di Aruba a competi den e categoria di certamen Señora Turismo Mundial.  E dama hoben simpatica Shannon Vullings a competi den Petite Tourism World.  Recientemente den oranan di anochi, nan a tene un brindis bek na Aruba, como cu e bon noticia ta cu Shannon Vullings a bay cu e corona di Miss Petite Tourism World, y docente Gen Ras a obtene titulo di Prome Finalista di Señora Turismo Mundial 2026.

   George Winterdaal di GLW Foundation tabata contento cu e resultado di Shannon Vullings y tambe Gen Ras.  Durante e conferencia di prensa, Gen Ras no por tabata presente.

   “Nos ta hopi contento di por bisa cu tanto Gen y Shannon a representa Aruba den un forma increibel. Di ora cu nan a yega, nan tabata bon informa di tur cos d Turismo di Aruba mes.  Y por a mira e esaki tambe durante e siman di e competencia, ora cu nan ta papia cu pasion y amor pa Aruba. Esaki ta hopi importante,” Winterdaal a splica.  El a bisa cu tabatin hopi fanatico cu ta yega cerca e candidatanan di Aruba pa saca potret, y tin biaha tambe banda di nan costume.  E dos candidatanan tabata haya chens di conta hendenan unda Aruba ta situa, etc.

   Shannon y Gen a haci un bon trabao.  Ademas di corona maximo di Miss Petite Tourism World 2026, Shannon a gana tambe e categoria di Foro Turistico.  Gen Ras tambe a gana e Foro Turistico pa su categoria.  George a agrega cu Shannon a haya e titulo tambe di “Tourism Ambassador” pa henter e competencia na Punta Cana.

  George Winterdaal tabata organiza pa 10 aña caba e certamen internacional aki na Aruba, y awor despues di 10 aña a sac’e for di Arub ay mand’e Punta Cana, cual ta un otro atraccion turistico tambe.

   “Y mi ta kere cu e simia aki cu a wordo planta, nos a haya un bon reaccion di parti di algun franchise internacional kendenan kier e certamen oa otro aña,” el a declara.  “Pues mi ta kere cu di awor aki en adelante ta crece nos lo kier pa e crece. Y un biaha mas, mi kier a yama un danki na Shannon pa su tremendo trabou.”

    Winterdaal sa cu e tabata un trabao fuerte di un siman, pero toch unda cu bo mira Shannon ta cana, bo tabata nota e sonrisa constant. “Anto esey mi ta kere ta hopi di agradecido na Shannon, pabien un biaha mas pa e bon trabao cu bo a haci,” el a finalisa bisando.