Segun Esther Broeksema di FCVR:
ORANJESTAD (AAN): Segun Directora di Fundacion Contra Violencia Relacional (FCVR), señora Esther Broeksema, e problematica di violencia domestico y violencia di genero ta uno compleho, cu su raiz ta relaciona estrechamente cu e manera muchanan ta wordo educa y forma for di cas.
FCVR ta organisa diferente charla y programa cu e meta di promove relacionnan sano y crea mas conscientisacion tocante señalnan di alerta y red flags cu por indica un relacion potencialmente dañino of violento. Pa FCVR, ta esencial cu personanan cu ta pasa door di violencia compronde cu nan no mester enfrenta e situacion nan so.
“Violencia, specialmente violencia domestico, no ta un asunto priva. Nos ta suplica tur persona cu ta pasando door di violencia pa busca ayudo y papia cu hende den nan circulo di confiansa, pasobra ayudo ta existi,” el a enfatisa.
Broeksema a indica cu e idea tradicional cu problemanan den un relacion mester keda “tras di porta cera” ya no ta aceptabel. E consecuencia di violencia domestico ta bay mucho mas leu cu e relacion entre dos persona. Yiunan por wordo afecta, trabou por wordo afecta y productividad en general por keda afecta.
“E problema aki ta afecta henter comunidad y, como comunidad, nos tur tin un responsabilidad pa atende cu ne di un manera of otro,” el a expresa.
Segun e director di FCVR, violencia ta resultado di un combinacion di varios factor. Entre nan tin e educacion den cas, bullying, stalking y acoso via internet of WhatsApp, fenomenonan cu, segun e, ta bira cada biaha mas alarmante. Otro factor cu mester ricibi atencion ta e cultura machista cu ainda ta presente den comunidad.
Riba e ultimo punto aki, Broeksema a señala cu, conscientemente of inconscientemente, mayornan mes por contribui na perpetua cierto patronnan, entre otro door di e diferencia den manera cu nan ta cria yiunan muhe compara cu yiunan homber y e expectativa cu nan ta crea tocante e rol di cada genero.
“Bo por bisa cu e problema aki su raiz ta den e educacion na cas,” Broeksema a enfatisa.
E manera cu nos ta cria nos yiunan, e ehempel cu nan ta mira y e rol cu nos ta siña nan ta influencia e manera cu nan lo mira relacionnan despues. Pa e motibo aki, FCVR ta considera educacion y prevencion como elementonan fundamental den e lucha contra violencia domestico y violencia di genero.
“Ainda nos tin hopi trabou pa haci pa sigui educa nos comunidad riba e tema aki. Mi ta contento cu nos tin partnernan den e sector social cu ta yuda nos den e proceso, entre otro Tienda di Educacion, cu ta ofrece diferente workshop riba e topiconan aki,” señora Broeksema a remarca.
