Cursonan pa facilita proceso pa yega na fondo pa Proyectonan Cultural riba topico di Sclavitud

ORANJESTAD (AAN): Diabierna siman pasa, Minister Maduro di Cultura tabata presente na inicio di e curso ‘Educa cu Cultura’ y

‘Descripcion y Maneho di Proyecto’ cu ta worde facilita den tres mita dia pa Comision Conscientisacion di Sclavitud den colaboracion cu UNESCO Aruba y UNOCA.

   E curso ta worde facilita pa por duna e participante un bista di e maneho di cultura en general, y con pa describi y maneha un proyecto. Kier logra pa e participante por ta bon prepara na momento di aplica pa haya sosten financiero na un di e fondonan Hulandes disponibel pa  por realisa proyectonan, specialmente esnan cu ta trata sclavitud na Aruba.

   Minister Maduro ta gradici señora Marushka Tromp y señora Ruby Eckmeyer di UNESCO Aruba y tambe señora Ray-Anne Hernandez di UNOCA cu a pone nan tempo disponibel pa duna e curso aki cu a conta cu 14 participante.  E mandatario tin e confianza cu na final di e curso, esnan presente lo por bay describi y maneha nan proyecto hopi mas miho.

   'Nos ta spera cu fo'i di Aruba hopi peticion por worde entrega y aproba cerca e fondonan Hulandes disponibel pa asina por concretisa e proyectonan na bienestar di cultura na Aruba,’ tabata palabranan di e mandatario. Minister Maduro ta desea tur participante hopi exito y ta gradicinan pa e esfuerso y aporte pa engrandece nos cultura.