ORANJESTAD (AAN) – Parlamentario Shailiny Tromp-Lee di fraccion di MEP, den conferencia di prensa a expresa su miho deseonan pa pueblo di Aruba, pa aña 2022.
E parlamentario a comenta cu Aruba a cera aña 2021 y a habri 2022 cu e variante Omicron di Covid-19, cu un situacion dificil y cifranan hopi halto, pero na mes momento un situacion menos alarmante, y no ta pone, su persona sigur, bay den panico.
El a bisa cu cifranan y data cu gobierno ta presenta na Parlamento, riba cual base nan ta tuma decision y medida, tin su persona trankil, y e ta kere cu comunidad en general, por tin e trankilidad aki.
Shailiny Tromp-Lee ta convenci cu for di momento cu Covid-19 a presenta na Aruba, Crisis Team encabeza pa Minister Presidente, ehecuta pa Gabinete Wever-Croes den su totalidad, a demostra cu na tur momento, ta crea e balansa necesario entre e salud di nos hendenan, y e economia di nos pais.
“Na tur momento nan a para na percura y garantiza, e seguridad di nos hendenan. Awo no ta otro, pasobra ta mesun hendenan ta forma parti di e grupo cu ta tuma decision, kico ta wordo haci den e situacion di crisis cu nos ta aden”, Tromp-Lee a señala.
Segun e parlamentario, opositornan politico no a haci bon uso di e recess; nan no a descansa, nan no a bay relativa, nan no a bay reflexiona. Nan no a habri aña cu positivismo. “Nan no a habri aña caminda nos ta bisa, ban nos tur aporta pa realiza e recuperacion cu ta asina necesario pa nos pais. Aña a bolter y nan a habri cu mesun critica destructivo, cu mesun negativismo, cu mesun aporte pa crea desunion y discordia”, Shailiny Tromp-Lee a bisa.
El a agrega cu oposicion ta keda subraya cu ta trata di mal maneho cu ta rekeri di tur medida y decisionnan cu gobierno ta tumando. El a subraya cu a keda demostra cu Gabinete Wever-Croes 1 y 2 a maneha e pais aki diligentemente; cifranan ta bisa esey, y despues di diez aña Aruba a conoce un deficit hopi chikito. “Si no tabata pa e pandemia, nos lo a conoce, despues di 12 aña, un presupuesto cu surplus di 46 miyon florin”, Tromp-Lee a bisa.
Refiriendo na gobierno anterior na MEP, E parlamentario a expresa cu tampoco por lubida e desaster financiero cu a keda atras pa nos pais, y cu hopi no kier pa gobierno reitera ni acentua.
Tromp-Lee a bisa cu realidad ta cu e situacion financiero di nos pais, na e momentonan aki, ta hopi grave, pero ocasiona pa un pandemia, cu a bin dal mundo henter benta abao, y no ta un excepcion pa Aruba.
“Pesey, for di akinan un yamada na politiconan y na tur cu kier ta critico. Crisis Team ta bin regularmente na Parlamento. Mi tin tur confianza den e team cu ta manehando nos pais; un team cu ta consisti di diferente cluster, diferente profesional, expertonan, y ta aconseha nos gobierno pa tuma e decision cu ta mas na beneficio di nos pais”, Shailiny a señala.
El a pidi pa ban duna Crisis Team e honor y gradici nan pa nan trabao. Critica semper ta positivo, pero a yega ora di mustra respet y bay den dialogo, segun e parlamentario, y ora di critica duna otro solucion. Esaki na un yamada na e contrincantenan, y pa pueblo en general, Tromp-Lee a bisa cu e recuperacion parcialmente ta den nos man: comportacion, vacunacion, y na mesun momento disciplina pa yuda drecha e situacion propio y di nos pais.
