ORANJESTAD (AAN): E pensamento di hopi hende ta cu bo ta drenta aña nobo completamente diferente compara cu 2021.
Pues un cas cu capa nobo di verf, cortina nobo, paña nobo riba mesa, y ta parce cu e trend tey pa habri aña cu corchon nobo tambe.
Expertonan ta bisa cu bao di condicionnan normal, un corchon tin di worde reemplaza cada 6 pa 10 aña. Esaki ta djis un guia general, y no ta un solucion cu ta aplicable pa tur situacion. Como cu tin varios factor cu ta influencia e decision, con frecuentemente bo tin di cambia e corchon.
Mester agrega cu cada corchon tin su “añanan di bida” diferente, cu ta depende riba e material, e fabricante, y e uso.
Claro cu bo por keda drumi riba un matras mas hopi cu 10 aña, y tin hopi hende cu ta haci esey pasobra corchon toch ta relativamente caro. Pero si bo keda drumi riba un matras cu ya ta na werki, e por tin consecuencia real tambe riba bo calidad di soño y bo salud en general.
Si diripiente bo ta cuminza ripara y ta puntra bo mes di con bo no por pega soño asina rapido, of pakico bo lomba ta haci dolor ora bo lanta, kizas e momento a yega pa un corchon nobo.
Y ta parce cu a lo menos un habitante di Bushiri Complex a dicidi esey, y lo ta disfrutando awor di mihor soño tur anochi.
