ORANJESTAD (AAN) – Ginelly Quandt, coordinador di e Centro di Actividad di Fundacion Rancho, a anuncia den conferencia di prensa Diahuebs, dos actividadnan grandi cu ta bay tin pa e luna di Januari aki.
RIBA DIA DI BETICO:
Un di e actividadnan aki, ta e careda di boto miniatura cu e fundacion ta organiza tur aña riba Dia di Betico; pues, dia 25 di Januari. E aña aki lo tuma lugar na Governors Bay Beach. Nan ta invita tur trahador di boto miniatura, cu kier apoya e bunita tradicion aki, cu ta bayendo perdi, pero cu Fundacion Rancho ta purba di mantene bibo, pa nan ta presente entre 9 or di mainta pa 3 or di atardi, dia 25 di Januari, Dia di Betico na e lugar ya menciona.
PROYECTO “FOOD SECURITY”:
E di dos actividad ta e mercado cu Fundacion Rancho ta organiza tur luna, cu ta e proyecto “Food Security”. E biaha aki e ta bay ta un tiki diferente bao e tema di Plantacion. “Nos kier invita tur hende cu ta planta na cas, cunukeronan local, pa nan bin expone den e marshe nan matanan, nan productonan, nan cosecha, pero tambe e personanan cu ta traha azeta na cas, remedi di mata medicinal, of cu tin mata medicinal na cas”, Ginelly Quandt a informa.
E mercado aki ta tuma lugar dia 27 di Januari. Tur interesado por tuma contacto cu Ginelly via e-mail di Rancho, unda tambe por inscribi pa participa den e bunita actividad aki.
Ginelly a señala cu ta hopi importante, pa keda enfoca riba seguridad alimenticio di e bario, pero tambe di henter Aruba, pa keda den e pensamento cu comunidad mester cosecha nan mesun fruta y berdura, y pesey bao e “Proyecto Food Security” e fundacion ta sigui enfoca riba plantacion local den bario, pero den henter Aruba.
