Seyo di Monumento Protegi poni na cas di famia Loefstop na Rancho

Cas di arkitectura tradicional

ORANJESTAD (AAN): E siman aki, Prome Minister Mike Eman a pone e seyo di monumento protegi na un cas di antaño tipico di Aruba, situa na Koningstraat 42, den bario di Rancho. E acto a tuma luga den presencia di miembro di famia, bisiña y representante di Monumentenbureau Aruba (MBA).

   Cu instalacion di e seyo, e cas aki a haya reconocimento como parti di patrimonio historico y cultural di Aruba. E edificio ta representa un parti di historia di Rancho, un bario cu anteriormente tabata un pueblo di piscador y cu a desempeña un rol importante den desaroyo di Oranjestad. Durante e ceremonia, Prome Minister Mike Eman a expresa su satisfaccion cu e decision di e famia di coopera cu e proceso pa proteha e cas como monumento. El a destaca cu ta importante pa preserva e casnan tradicional di Aruba, pasobra nan ta representa e historia, cultura y identidad di nos comunidad.

   Prome Minister a recorda cu Rancho tin un historia rico, particularmente di e generacionnan cu den e temponan dificil a traha duro, entre otro den piscamento, pa construi un futuro pa nan famia y pa Aruba. Un parti di e historia di nos hendenan a keda conserva den e casnan tipico cu ainda ta existi den e bario. Eman a splica cu Gobierno, den cooperacion cu Monumentenbureau Aruba (MBA), ta trahando pa acerca propietarionan di casnan cu ya ta califica como monumento protegi, pero cu ainda no a ricibi nan seyo oficial.

   Pa completa e proceso aki, ta importante pa haya tambe e consentimento di e propietarionan.

   Ademas, el a menciona e posibilidadnan cu ta existi pa yuda e propietarionan cu desea restaura nan cas monumental. Entre otro, tin combersacion cu banco pa facilita prestamo cu interes special pa restauracion, mientras cu Stichting Monumentenfonds Aruba (SMFA) lo por ofrece oportunidad di apoyo financiero. Monumentenbureau Aruba tambe por brinda asistencia tecnico y conseho den preparacion di pinta mapa y e proceso di restauracion, conforme na e reglanan di proteccion di monumento.

   Historia di generacionnan: Servin Loefstop, nieto y heredero di e propiedad, a expresa su orguyo cu e cas di su famia awor ta oficialmente reconoci como monumento protegi. El a conta cu e propiedad tin un historia largo den su famia, for di tempo di su bisabuela, kende a hereda e cas y posteriormente a pone e propiedad na huur durante hopi aña.

   Aunke Servin mes nunca a biba den e cas, e propiedad ta representa un legado di e famia cu awor ta forma parti di e patrimonio protegi di nos isla. Segun Loefstop, e monumentonan ta importante pasobra nan ta haci nos historia visibel. El a destaca cu preservacion di e edificionan aki no ta solamente den interes di e famia propietaria, sino tambe di henter comunidad Arubiano.

   Loefstop a splica cu e posibilidad di proteha e cas tabata algo cu e y su rumanan a considera anteriormente. Ora e oportunidad a presenta, nan a dicidi di sigui cu e proceso.

   El a anima otro propietario di cas historico pa considera e posibilidad di proteha nan propiedad como monumento, teniendo na cuenta cu e edificionan aki ta representa no solamente legado di un famia, sino tambe un parti di historia di Aruba.

   Arkitectura tradicional cu ta refleha historia di Rancho: Raul Gei, director interino di Monumentenbureau Aruba (MBA), a splica cu e cas na Koningstraat 42 ta forma parti di un grupo di tres cas cu tin un arkitectura identico y cu ta hopi reconocibel den e bario. Segun Gei, e edificionan aki tin un balor historico importante pa Rancho y Playa Pabou, pasobra nan ta forma parti di e identidad di e comunidad y ta mantene bibo e recuerdonan di generacion anterior. E director interino a indica cu den e proximo dianan otro cas historico tambe lo ricibi nan seyo di monumento protegi.

   Segun informacion historico comparti pa Monumentenbureau Aruba, e cas na Koningstraat 42 ta un ehempel di un cas di cunucu tradicional, construi den un stilo arkitectonico artesanal.  E edificio tin un dak di tegels Hulandes y ta presenta algun caracteristica particular, entre otro e ausencia di un regenbak y goot pa colecta awa di yobida. Monumentenbureau ta indica cu posiblemente e dak di tegels a wordo instala despues cu e cas a haya conexion cu e sistema publico di distribucion di awa, aunke mas investigacion historico ta necesario pa confirma esaki.

   Un otro aspecto importante ta e posicion di e cas, construi paralel cu e caya, mescos cu otro edificionan den su cercania. E patron aki ta refleha un forma di planificacion urbano di Oranjestad cu a cuminsa e tempo ey caba, cu caya y area organiza segun un diseño defini. Koningstraat tabata forma parti di e puebl piscador di Rancho, caminda e terenonan cu Gobierno tabata asigna na e habitantenan tabata relativamente chikito.