Frank Ponson, presidente di CUA:
ORANJESTAD (AAN)-- Comerciantenan Uni Aruba (CUA), a yama un conferencia di prensa den cual señor Frank Ponson a hiba palabra. CUA su tema tabata “Bestand Minimo”.
El a cuminza bisando cu esaki ta un tema hopi menciona door di gobierno, y Ponson ta kere cu nan mester trece algun punto dilanti.
El bisa cu e ta asumi cu bestand minimo ta tur e cosnan cu pueblo tin necesidad di nan pa wordo uza. Pero kico ta necesidad?
“Cosnan cu tur hende na Aruba mester di dje: coriente, awa, gasoline, hasta internet awendia cu no ta un luho mas, pasobra tur hende cu ta bay scol mester tin internet. Kico e cuater companianan aki, ironicamente tin den comun? Tur ta companianan estatal, pues di gobierno, y tur tin un posicion di monopolio. Kico mi kiermen cu esey? Cu no tin ni un competencia pa nan”, Ponson a exclama.
Esaki ta nifica cu ningun otro hende ta distribui coriente, no traha coriente, gasoline, etc. “Pues tur esakinan ta companianan estatal cu no tin ningun competencia” Frank Ponson a reitera. Ponson a uza informacion specificamente di gasoline, pa mustra e pueblo e diferencia entre cuanto p laca e companianan estatal aki ta gana, mientras cu gobierno semper ta punta riba e comerciante. El a referi na un carta di FENSA, tocante e gasoline cu ta wordo bendi y e “wholesale prijs” papiando pa cien liter. E prijs ta 232 florin, incluyendo BBO. Nan ta bende gasoline na 250 fls na wholesale, na tur e companianan di gasoline cu ta fls.2,50 pa liter. Economische Zaken, ta indica na ki prijs e comerciante mag bende gasoline. E ta mustra cu e ta cumpre pa fls.2.50 pa liter y tin cu bende na 2.91 pa liter (inclusive BBO). Kiermen tin dos stap di BBO den e gasoline.
“Mi ta kere cu gobierno ta sconde tras di e berdadnan. Den cada liter tin 71 cen di accijns pa gobierno”, Frank Ponson a subraya y segun un calculacion cu e mes a haci, unda ta sali na cla cu na BBO so tin 13% di e fls.2.91 pa liter; 24% di bo prijs ta accijns. FENSA ta gana masha poco: 8 cen. Total Gobierno ta ganando 40.3% di e bedrag cu bo ta paga na gasoline. Pero e ironia mas grandi ta cu e retail, e gasoline station cu no tin monopolio, cu mester competi cu tur e otro gasoline stations, y tin gastonan envolvi mag gana 7.3% so”, Frank Ponson a señala.
