Via conferencia virtual prensa por a haci pregunta - ORANJESTAD (AAN): Diamars mainta Conseho Electoral na Censo a tene un conferencia virtual di prensa,
unda cu Geward Bikker a duna un splicacion riba e setup den e edificio di Censo riba e anochi di eleccion.
El a mustra potret di e setup di 2017 y a indica cu e aña aki lo ta practicamente mescos.
Segun Bikker, den e control center ta bay tin un HDMI box cu splitters cu por wordo uza.
“Segun mi por a compronde, na 2017 Tele Aruba a hasi uso di e HDMI box pa tin conexion cu nos presentacion”.
E box ta bay ta disponibel pa tur prensa cu kier haci uso di e HDMI, segun Bikker.
El a indica cu dependiendo di e cantidad di miembro di prensa cu ta bay haci uso di esaki, lo evalua si mester amplia e cantidad di conexion.
Banda di esaki ta bay tin un hot spot di Wifi pa tur prensa, unda cu e capacidad ta bay ta di 18 pa 20 hende den Stadhuis.
Bikker a sigui splica cu presentacion di e resultadonan di cada urna pa loke ta voto y asientonan lo ta practicamente manera eleccion pasa, usando e mesun tipo di graficonan.
Durante e encuentro virtual prensa a haci algun pregunta riba e diferente posibilidadnan y e representante di e Conseho Electoral a indica cu si despues prensa tin mas pregunta, nan por contesta esakinan tambe.
