E condicion pa hende ta un lider ta mucho mas cu fungi como charlatan - *Na 2009 Mike a baha mita BBO pa na 2010 e splica cu no por baha BBO
ORANJESTAD(AAN)—Cu hende ta comete eror den nan bida, ta conoci. Cu un lider tambe tin momento cu e ta faya, ta mas cu normal. Pero ora tur cos ta fayo, sin logro sigur un hende no por yama su mes lider.
Na porta di eleccion 2021 Aruba ta wordo confronta cu mas accion historico di Mike Eman, cu a laga skirbi un buka riba su historia, pero awor mester laga traha no un appendix pero un lista di “errata” cu ta describi con Mike su fayonan y fantasia a destrui Aruba.
Cu Mike ta un lider di fantasia, ta uno di puntonan cu sigur a bini dilanti durante tur debate na Aruba, ora for di espacio Mike a bolbe den mundo politico di Aruba.
Ora mira bon, e debatenan a bira ocasion pa porfin Mike bolbe, despues cu pa basta dia e ta busca atencion na tur tipo di forma, pero no a haya.
Tur e tempo Mike no a para keto na e realidad, cu su el a drenta Parlamento, tur e dia e por tabata den noticia.
Na diferente occasion DIARIO a puntra con por ta posibel cu e persona cu a haya mas voto personal di votadonan na 2017, a keda for di Parlamento.
Na vispera di eleccion, algo sumamente increibel ta sosode, ora Mike mester splica Pueblo cu si vota pa su persona, e ta drenta Parlamento. Esaki ta nifica cu pa Mike, drenta Parlamento automaticamente pasobra Pueblo a vota pa bo, no ta algo cu por a spera.
Algun dia prome cu eleccion Mike a bolbe.
Mike tabata tin curashi pa bay debate y ataca maneho cu a wordo hiba dor di Prome Ministro Evelyn Wever-Croes, sin por a bisa pakico e mes no a forma gobierno na 2017 y pio ainda pakico e no tabata den Parlamento pa atende cu Evelyn Wever-Croes for di 2017.
Si sigui historial di Mike y sigur su mundo di fantasia, probablemente Mike lo a spera cu Aruba lo a bay yora na su porta di cas pa pidi pa e bolbe. Esaki no a sosode y awor Mike ta dal tur tipo di buelta pa bolbe.
Con Mike ta kere cu e por dirigi un pais, si e mes no sa unda e ta bay?
Prueba ta e forma cu el a gana eleccion y corta BBO na 2009 cu e promesa cu na 2010 e lo deshaci di resto di BBO. Na 2010 e mes a splica Pueblo cu e no por deshaci di BBO pasobra Aruba lo zink den su man.
Den porta di eleccion, Mike a duna Pueblo di Aruba e prueba cu Pueblo tabata tin mester cu e ta un charlatan politico, cu no por dirigi ni su mes!
