ORANJESTAD (AAN): Iluminacion di cayanan na Aruba ta contribui indudabelmente na seguridad di nos hendenan y ta deber di entre otro un gobierno pa percura pa cu seguridad riba nos isla.
Ta asina cu clientenan di Biba Bou Guia cu ta habita den becindario di Ambiente Feliz na Santa Cruz ta haya cu e caya dilanti nan viviendanan ta scur y nan ta haci falta di iluminacion den nan area.
E clientenan di Biba Bou Guia ta biba mas independiente posibel den nos comunidad. Mas ainda clientenan di e fundacion aki tin limitacionnan y tambe limitacion mental. Pa e motibo aki e Parlamentario ta considera cu pa ilumina e caya dilanti nan viviendanan hopi importante cu ta contribui na nan trankilidad y un ambiente mas sigur.
Pesey Parlamentario Setty Christiaans-Yarzagaray a opta pa introduci un mocion durante tratamento di presupuesto di DOW pa aña 2021 na unda e Parlamentario a urgi Gobierno di Aruba pa pone iluminacion den e caya den becindario di Stichting Ambiente Feliz cu ta e caminda cu ta bay pa e viviendanan di clientenan Biba Bou Guia.
Cu esaki Parlamentario ta cumpli alabes cu su responsabilidad como representante di pueblo pa vocifera e deseo di nos clientenan di Biba Bou Guia cu a acerca su persona cu nan preocupacion. Ta comprendibel ademas cu awendia iluminacion ta trece mas trankilidad y sigur ta contribui na experencia un ambiente mas sigur.
