LIMA: Pueblo di Peru a keda den shock y tambe hopi disgusta ora cu un caso a bolter 180 grado, na momento cu detectivenan a bin descubri detayenan di e secuestro di un muher supuestamente na estado,
y cu criminalnan a induci parto pa nan horta su baby cu e ora a nace, na pueblo San Juan de Lurigancho.
A bin sali na cla cu Anali del Pilar Luna Tavera di 37 aña di edad nunca tabata na estado y a djis fingi su secuestro y e hortamento di su baby mucha muher, djis cu e meta pa obtene e suma di 200 mil Sol (como US$ 50 mil) di su pareha, cu ta un empresario Colombiano.
Esey ta conclusion di detectivenan di Division di Investigacion di Secuestro (Dirincri) di Polis Peruano.
Anali del Pilar awor a pasa for di victima, pa esun cu ta deteni debi cu el a entrega keho falso. Polis a bisa cu hecho ta cu su denuncia a pone detectivenan move pa 3 dia largo pa su buskeda y rescate, y tambe pa por identifica e supuesto secuestradornan.
Durante e investigacion di Dirincri, ora cu nan a logra libera Anali del Pilar, nan a cuminza ripara den interogacion cu cada biaha su storia ta cambia, y a cuminza contradeci su mes, y finalmente ora cu el a ripara cu nan a descubri tur cos, el a djis confesa cu su storia ta puro gañamento.
Anali del Pilar a declara na Polis cu tres homber den un auto color preto, a secuestr’e na momento cu e ta bayendo pa un cirugia medico dia 19 di October. Pero tur video di Security Camera no a mustra esaki, y semper e tabata canando su so.
Despues detectivenan a busca informacion di e clinica unda e muher tabata supuestamente ricibi su chekeo di embarazo y e clinica a keda sorprendi. Nan a saca un relato pa mustra cu e muher aki nunca no por sali na estado, pasobra na aña 2012 el a opera y haci un metodo anticonceptivo yama ‘blokeo tubarico bilateral’.
Y pa colmo, nan no tin ningun caminda poni riba agenda cu e tin di haci un operacion eynan pa 1:00 pm na e clinica.
Ora cu detectivenan a mustre tur e pruebanan aki contra dje, Anali del Pilar a ripara cu el a haci algo sin planea su storia corectamente y a lubida cu tin Security Camera ta existi. E ora el a djis confesa cu el a inventa tur e storia di embarazo y di su secuestro.
Pa awor e ta deteni y lo keda asina te ora cu e presenta dilanti Huez.
