Hoben Rafael Garcia a lanza proyecto 'Step it Up 2021'

ORANJESTAD (AAN) – Rafael Garcia ta un hoben di 19 aña di edad, ken a lanza Diadomingo ultimo, e proyecto 'Step it Up 2021'.

El a splica cu saki ta un proyecto cu a participa den e di dos edicion di Pitch Time, cu ta un proyecto di Cede Aruba. E proyecto 'Step it Up', ta pa duna realce na e vak di CKV y tambe arte.

Diadomingo anochi cinco scol secundario a wordo invita, y 56 hoben cu lo forma parti di e prome edicion di 'Step it UP'.

Nan lo cuminza dunando e muchanan les di diferente tipo di baile, cu ta Folklore, Latin Dance, y tambe Commercial Dance, y ademas nan lo haya les di salud y nutricion, cu ta tres tayernan di trabao.

E proyecto aki tin duracion di un luna, y lo termina dia 20 di November, cu ta Dia Internacional di Derecho di Mucha, cu un competencia entre tur e scolnan cu participa. E competencia final lo tuma lugar den Club Caiquetio, dia 20 di November mes.

E idea a surgi, ora cu Garcia a ripara cu na 2020 ora cu Covid-19 a drenta Aruba, hopi hoben a cay den depresion, nan a aleha hopi, y algo cu a perde su valor ta ARTE. Pesey nan ta desaroya e proyecto aki cu alumnonan di scol secundario via e materia di CKV.

E cinco scolnan cu lo participa den e prome edicion ta Maria College, Abraham de Veer Scol, Schakel College, Mon Plaisir College y tambe Scol Practico pa Ofishi di Santa Cruz.