Setar y otro partnernan ta trece diferente topico dilanti durante “Digital Week”

Director di Setar Ing. Roland Croes:

ORANJESTAD (AAN) – Director di SETAR, señor Roland Croes, den conferencia di prensa Dialuna, a duna diferente ehemplo di e innovacionnan cu e mundo digital a trece cu ne y cu a desaroya na un forma vertiginoso durante y despues di e pandemia di Covid-19, y un di e sistemanan masha importante aki ta what’s app.

El a señala cu loke a pasa tambe cu esey, si nos wak bon, ta cu e paisnan y e companianan tambe mester a cambia.

“Diripiente tur compania a realiza nan mes cu nan no por sigui haci negoshi manera aworaki. E ora ey e terminologia y AI ta bira mas relevante.  AI ta un tecnologia di 70 aña pasa cu a cuminza mehora tur e partinan te ora el a yega akinan, pero diripiente na aña 2022 ora cu ChatGPT a bin, tur hende a mira cu esaki ta e forma nobo di traha. AI ta yuda bo, pero e tin dos cos cu ta haci: e ta haci bo mas productivo, cu bo por produci mas cos, pero banda di  esey e ta haci otro cos hopi importante, e ta baha gasto; pasobra con cu bay bin bo tin empleadonan y diripiente bo no por paga nan, kiermen no tin entrada anto hende tin cu bira creativo” segun ing. Roland Croes ta splica.

El a reitera cu AI ta cambia e habito, e manera di haci negoshi, y t’asina cu e ta cambia e paisnan tambe. “Na e momentonan aki, si como pais, bo no tuma e desaroyo, adapta y compronde cu asina mundo ta bay draai, y si e companianan y e hende no ta compronde cu algo ta cambia pa semper, bo no por bin bek mas.

Anto, ora como compania, nos ta ripara esey tambe, como SETAR nos ta pensa, y esey ta realidad, cual ta e manera cu nos por yuda den esaki. Pesey nos a bin cu e actividad cu yama Setar Digital Week, pasobra con cu bay bin e mundo a bira digital. E desaroyo ta bay asina lihe anto nos ta contribui un rato cu esaki. E siñamento di nos hendenan. E ta dura cinco dia largo, tin diferente sesion di un ora, na unda SETAR mes y otro partnernan ta trece diferente topico dilanti”, director ing. Roland Croes a duna di conoce.