ORANJESTAD (AAN): Recientemente Aruba Tourism Authority y Foundation Run in the Sun,
cu ta organiza e KLM Aruba Marathon, a firma un acuerdo di tres aña di patrocinio, cu ta sigura cu e evento aki lo sigui pa 2026, 2027, y 2028.
E acuerdo a wordo firma oficialmente door di Ronella Croes, kende ta CEO di ATA, y Kees van Muiswinkel, kende ta fundador y president di e KLM Aruba Marathon. E partnership renoba aki ta mustra e dedicacion comparti di e dos organizacionnan pa promove Aruba como un destinacion premier di deporte y bienestar.
“Nos ta hopi agradecido na Aruba Tourism Authority pa nan confianza continuo, sosten, y cooperacion profesional,” ta loke Kees van Muiswinkel a bisa. “Hunto nos ta lucha pa mehora e calidad y visibilidad di e KLM Aruba Marathon cada aña, ofreciendo participantenan di Aruba y for di rond mundo y experiencia inolvidabel di coremento riba One Happy Island”.
KLM Aruba Marathon a crece y a bira un evento popular di coremento, cu ta atrae miles di coredor y sostenedor for di mas di 40 pais. E careda ta ofrece multiple distancia, incluyendo e full marathon, half marathon, 10K, y 5K, y ta showcase e fenomenal costa, hospitalidad, y atmosfera vibrante.
E sponsorship largo aki ta sigui reforza e posicion di Aruba como un destinacion cu ta balora salud, turismo di deporte, y colaboracion internacional.
E careda aki a cuminza na 2018 pa promove turismo, coremento, y un estilo saludabel riba e isla. E siguiente lo bay ta Diasabra 6 di Juni, y Diadomingo 7 di Juni 2026. Registracion a habri caba, y ya tin participante di 17 otro pais cu a registra nan mes.
Pa KLM Aruba Marathon 2026, ta bay spera 2.750 participante for di 40 pais. E marathon aki ta un careda oficialmente certifica door di Association of International Marathons and Distance Races (AIMS), y tambe World Athletic Federation, sigurando su status como un careda premier internacional.
