Setar ta sumamente orguyoso di Robert Jeandor

ORANJESTAD (AAN): Diabierna ultimo den un Renaissance Convention Center, Sr. Robert Jeandor a worde honra cu e premio Crioyo di Oro.

   Aworaki na 2023, sigur ta henter Aruba conoce Robert Jeandor. Un artista y musico Arubano cu a destaca y demostra un habilidad musical impresionante desde hoben. Robert a cuminsa cu su baho na 1964 cu e grupo Las Blancas Palomitas. Den añanan 70 Robert a sigui desplega su talento cu Los Juveniles, como cantante, bahista, compositor y arreglista. Robert y Los Juveniles a conkista e premio maximo den festival di Tumba na 1976, 1977 y 1978. Den su totalidad, Robert a sali Rey di Tumba 5 biaha na Aruba.

   Robert a forma parti di Los Hijos del Rey, riba invitacion di e legendario Johnny Ventura, unda cu nan toca den salanan grandi na diferente paisnan rond mundo. Na fin di decada 80, Robert a forma ‘Robert y su Solo Banda Show’, un orkesta musical cu te awe ta cosecha exito y respet pa nan forma magnifico di presenta. Robert tin premionan y logronan grandi riba su nomber. Un sin fin di hitnan musical den e topnan mas importante di varios pais latino americano, disconan di oro y te hasta Grammy Mericano formando parti di “Bachata Rosa” di Juan Luis Guerra.

   Setar ta orguyoso: Robert Jeandor ta 60 aña di musica y inspiracion. SETAR como patrocinador principal di Crioyo di Oro, kier extende un palabra di Pabien na Sr. Jeandor cu su premio y pa tur su logronan den e mundo artistico local como internacional!

   Tambe un Pabien ta bay pa Rose-Marie Provence cu su premio Estimulo, Marta Figueroa cu su premio Sostenedor di Excelencia y Ruben Garcia (qepd) cu e premio Homenahe Postumo.