Setar ta introduci paketenan nobo yama Pick & Choose

Sinti e libertad di scoge bo servicionan di cas

ORANJESTAD (AAN): Siman a habri cu bon noticia for di Setar NV.  Durante un conferencia di prensa convoca na e compania, e director Roland Croes a presenta nan servicio ambicioso pa Aruba.

   E anuncio aki a bin net 20 aña despues cu pa prome biaha Setar na Juli 2003 a introduci servicio di ADSL cu a pone pa prome biaha, comunidad por a haya Internet 24 ora non-stop y sin limite.  E tempo aya, e velocidad di data tabata di como 20 mbps.  Na 2015 a introduci CableNet cu speed di 100 mbps, cu tabata un decision strategico cu e compania a tuma e tempo ey pa cambia di ADSL bay pa CableNet y un velocidad mas halto.  CableNet a wordo introduci como un intermediario, pasobra Setar a fiha su meta pa instala fiberoptic cable pa tur cas na Aruba.  Y unavez cu tin fiber, nan sa cu lo bay pone entrega di señal di TV bin tambe via e sistema di IPTV.  A sigui traha riba e labornan grandi pa stabiliza e sistema. Y awor a yega asina leu cu ta cla pa bin cu servicionan nobo.

   Servicio nobo pa Cas: Ta asina cu ya for di Dialuna 3 di juli 2023, Setar NV a introduci e concepto nobo di su servicionan yama ‘Pick & Choose’.

   Cu Pick & Choose clientenan mes por scoge cua servicio nan kier, esta un, dos of tres servicio.

   Ademas hunto cu Pick & Choose, Setar NV ta introduci un plan nobo di Internet cu speed di 1 Gigabit pa seconde. Pa loke ta plannan di TV, SETAR lo ofrece awo solamente paketenan di IPTV.

   Segun Croes, e clientenan cu scoge paketenan di Pick & Choose y combina servicio ta ricibi descuento dependiendo di ki combinacion di servicio tuma. E descuento aki ta valido tanten cu e cliente tin su pakete di Pick & Choose. E servicio di Internet ta bin cu Wi-Fi Mesh cu tres access points.

   Clientenan cu scoge pa tres servicio por scoge entre paketenan di Setar Complete y lo haya mas balor pa nan placa cu entre otro mas minuut y speed. Setar ta introduci tambe e pakete nobo yama Setar Complete Prime cu speed di 1 Gigabit pa seconde.

   Cu e cambio aki, Setar NV kier ofrece su clientenan e libertad di scoge entre un, dos of tres servicio segun preferencia.

   Ministro di Comunicacion, Geoffrey Wever tambe tabata presente, y el a mustra di ta satisfecho cu Setar NV ta treciendo servicionan cu ta mantene comunidad contento.

   Bishita cualkier un Teleshop pa aplica pa Pick & Choose. Bishita e website www.setar.aw pa mas informacion di Pick & Choose.