Setar a bay regala muchanan di Scol Caiquetio tickets pa bay mira e Jet Car

ORANJESTAD (AAN): Recientemente Setar NV hunto cu Brazilian Flash Racing Foundation tabata presente na Scol Caiquetio pa haci entrega di tickets pa e ‘Caribbean Shootout 2024: Mega Jet Car Invasion’.

   Esaki ta den cuadro cu e di 35 aniversario di e organizacion, y cu lo tin competencianan grandi riba dianan 3, 4, 5, y 6 di October na Palo Marga.  Autonan y brommer lo bin for di Curaçao, y tambe lo tin di Puerto Rico.  E atraccion principal lo bay ta un Jet Car.

   E bishita di Setar NV tabata pa regala muchanan di Scol Caiquetio un entrada gratis pa disfruta di e mega evento na Palo Marga durante e siman di vakantie.

   Corda bon cu October Vakantie e aña aki ta start Diabierna 4 di October, y ta finalisa Diabierna 11 di October.  Pues Diahuebs 3 di October ta ultimo dia di scol.