ORANJESTAD (AAN): Hoofdstembureau a informa cu lo tin dos sesion publico accesibel pa tur votado tocante e validez di e listanan di candidatonan.
E proceso a cuminza caba Diabierna 1 di November cu a pasa, unda Hoofdstembureau a reuni den un sesion cu no ta publico pa revisa e lista di candidatonan cu a worde entrega dia 18 di October 2024 pa asegura cu e lista di candidatonan ta conforme cu e ley di Ordenansa Electoral.
Tur partido politico lo worde notifica dia 4 di november 2024 via email tocante e coreccionnan necesario cu mester haci riba nan lista y tin te cu dia 7 di november 2024 pa haci e coreccionnan necesario. Despues ta sigui cu e prome sesion publico di Hoofdstembureau pa oficialmente anuncia e validez di e lista di candidatonan dia 8 di November 2024 pa 10:00 am.
Den caso cu no tin apelacion den dos dia contra di e decision aki, Hoofdstembureau lo procede cu lot pa numera e listanan y asigna color (tambe via di lot si ta necesario) den un sesion publico dia 13 di november 2024 pa 10:00 am.
Si acaso tin apelacion na Corte tocante e validez di e lista di candidatonan, e sesion di numeracion y asignacion di color lo tuma lugar mas tarda dia 21 di November 2024. Hoofdstembureau ta invita tur votado y interesadonan pa tuma nota di e sesionnan publico cu lo tuma luga na Registro Civil y Censo riba e fechanan menciona ariba y pa keda pendiente pa e link virtual di e livestream cu lo worde publica riba nan rednan social. Pa mas informacion, bishita e website oficial di Conseho Electoral Aruba na www.er.aw y e plataformanan lo sirbi como un recurso importante pa votadonan, partidonan politico y publico general, pa keda al dia cu anuncionan, fecha nan y guia relevante pa e eleccion di Aruba.
