Gino Goeloe, director WGK:
*Bao mayornan tin hopi stress pa varios motibo
*Por ehemplo problema financiero, costo di bida y mas
ORANJESTAD (AAN) – Director di Wit Gele Kruis, Gino Goeloe, señor Gino Goeloe, den un entrevista cu DIARIO a referi na e opleiding cu WGK ta brindando su personal pa nan guia e mayornan den e aspecto di comunicacion cu nan yiunan chikito.
Manera ta conoci WGK ta atende cu muchanan di 0 pa 5 aña, y ta start cu e curso “Mayor Firme” cu ta pa mayor cu tin yiu di 0-2 aña unda cu e nurse specilisa Maryla Solognier ta guia mayornan, y eynan a consta problema di comunicacion cu nan yiunan, anto door di trece profesionalnan di Hulada, psicologonan cu hopi experiencia, pa bin training personal na Aruba, no solamente di GWK, sino di DVG, Fundacion pa Nos Muchanan, DAS y KPA y trahadornan di instancianan di Bonaire cu ta bin Aruba, specialmente pa e training aki.
“Pues, un grupo grandi cu ta hayando e curso aki awe, prome pa nos papia e mesun lenguahe, pues pa prome biaha nos ta haya diferente fundacion cu ta bin cu diferente teoria y vision, pero den e caso aki di yiunan di 0-2 aña tin cu bay concentra mas den e relacion di mama cu yiu, tata cu yiu, famia, y esey ta e parti cu nos ta enfoca riba dje, y pesey nos ta trece e dos coleganan (di Hulanda) cu tin hopi experiencia”, Gino Goeloe a relata.
El a agrega cu señora Lupina Croes ta e persona cu a cuminza cu esaki, WGK a cuminza cu e opleiding. Y un par di profesional di WGK a caba cu e training di “Salud Mental Infantil” y awo WGK ta continua cu ne.
Goeloe a indica cu esaki ta bay bira un proceso di cada tres aña cu nan ta bay trece bek pa keda educa su profesionalnan den diferente ramo, p’asina aki pa nan tur papia e mesun lenguahe y keda enfoca riba e mucha.
“Nos sa cu awendia tin hopi stress den e mayornan, pa e parti financiero, perdemento di trabao, costo di bida ta subi. E ora ey nos ta purba entrena nos hendenan pa ora nan bay bishita cas nan entrena e mayornan tambe con nan por anda cu e stress ey, pa nan no bah’e riba e pober yiu aki”, Gino Goeloe a acentua.
