Lupina Croes, Psicologo di WGK:
*WGK a hinca e metodo IMH den Paternidad Firme
ORANJESTAD (AAN)—DIARIO a entrevista señora Lupina Croes, di Wit Gele Kruis, kende a duna informacion di e opleiding “IMH” (Infant Mental Health) cu e institucion aki a cuminza duna su personal.
For di 2016 el a wak si na WGK por cuminza cu “IMH” cu ta “Infant Mental Health” cu ta pa muchanan di 0 pa 5 aña, pues nan ta mucha hopi chikito ainda, y a cuminza cu otro opleiding di 2 aña y mey, duna pa otro organizacion di Hulanda, y awo tin un par di hende di WGK cu a bira specialista den IMH (Salud Mental Infantil).
“Nos, na WGK despues di un par di tempo a ripara cu kier a mira si nos por a hinca e metodo di IMH den ‘stevig ouderschap’ (paternidad firme), y den esey mi a invita e hendenan aki, cu mi ta sigui otro curso cerca nan, si nan por a bin akinan pa yuda nos un tiki cu esey, pero wak tambe si tur hende den Wit Gele Kruis tin e curso aki, tur kende sa kico e ta, pa tur hende nan nanishi ta den mesun liña. No mester sa cu asina nos ta bay trata e mayornan, ta bay pa e conexion entre mayor y yiu, y nos ta bay trata nan na riba un manera cu nos sa cu nan ta e vehiculo pa nan yiunan por desaroya nan mes bon”, Lupina a menciona.
Lupina Croes a bisa cu na Aruba tin hopi stress, pasobra hopi hende tin cu traha mas di un trabao, y nan tin yiu tambe, y e conexion por core peligro door di e stress cu e persona tin.
“Mi ta kere cu e nivel di stress na Aruba ta basta halto, pasobra nos tur tin hopi obligacion, nos famia, nos mayornan cu ta birando bieu, nos yiunan cu mester nos cuido, y nos conexion tambe”, Lupina Croes a señala.
