Servicio di Emergencia na ImSan a haya un Sala Bunita pa atende Mucha

ORANJESTAD (AAN): Diabierna mainta, na ImSan na San Nicolas a inaugura un asina yama “Kinder Kamer” masha bunita mes.

   E ta un dia special pa ImSan, pasobra durante renobacion di e edificio y tambe e Servicio di Emergencia a wordo renoba completamente.  Tabatin existente un camber di mucha cu tabatin su dibuho y atraccion pa mucha.  Den curso di renobacion, lamentablemente tur e murayanan bunita ey mester a wordo kibra.

   Ora cu e Servicio di Emergencia nobo a keda cla, semper tabata deseo di Dr. Joel Raijnherc (como pediatra), y di tur enfermero y docter pa bin cu e sala di mucha bek.  A haci promesa cu lo bay haci esey.

   E enfermeronan mes a busca un hende cu tin amor y cariño pa haci e trabao di diseño y pintura!  Pesey nan ta contento na Alonso Williams cu e bunita trabao.  Nan ta hopi agradecido pa loke el a crea.

   Pesey awor ImSan ta contento pa bisa cu nan a keda cla cu renobacion, pero tambe un mihor Servicio di Emergencia na ImSan, y un fabuloso Sala di Mucha.

   “Cu mil amor, mi sa cu tur hendenan trahando aki ta pone nan alma y curazon den e trabao aki, y principalmente mucha ta dificil den Servicio di Emergencia, y si bo por haci e ambiente un tiki mihor pa nan, esey ta tremendo.  Mi ta kere cu esey ta un logro cu nos a yega na dje awe,” Dr. Raijnherc a indica.

   E ta aplaudi tur trahador, pa tur e pasenshi cu nan tabatin durante e renobacion, y tambe e momento di pintura di edificio y di e Sala di Mucha aki.

   Director di ImSan a indica cu e artista Alonso Williams no a acelera e proceso di pinta e camber aki, pues el a dedica su mes full pa asina e bin como un obra maestro.

   E ta spera cu muchanan no ta bin Servicio di Emergencia na ImSan, pero nan sa cu nan lo bin, y awor cu nan yega nan lo tin un Sala mas trankil pa nan.

   Hefe di Servicio di Emergencia na ImSan, Roxanna Maduro tambe a gradici tur hende, y tambe e artista Alonso Williams.  El a gradici nan director Dr. Raijnherc tambe di a sostene nan empuhe pa haci e Kinder Kamer bira realidad.

   Segun Roxanna Maduro, e Kinder Kamer aki ta trece trankilidad pa e muchanan cu yega na ImSan.  Aunke ya caba e Enfermeronan a spanta e muchanan cu uniform, toch e Sala di Mucha ta trece alivio y trankilidad pa nan.

   E cinta di e Kinder Kamer a wordo corta door di Roxanna Maduro mes, den presencia di Dr. Raijnherc, e artista Alonso Williams, y demas enfermeronan y funcionarionan di ImSan.