ORANJESTAD (AAN) – Gobernador Alfonso Boekhoudt tabata presente durante e apertura di Aruba Doet na Cas Sjbururi, Diabierna mainta.
Gobernador Boekhoudt a expresa cu pa su persona tabata un gran placer di ta presente pa haci apertura oficial di Aruba Doet 2021.
“Pa mi semper ta un grato placer pa participa na e momento di haci e kick off oficial di Aruba Doet, pasobra e ta algo cu ta sali realmente di e curazon di esnan cu ta traha; di e curazon di e boluntarionan. E ta algo cu nos ta aprecia masha hopi mes pa wak con e ta tuma lugar. Riba su mes, cualkier actividad cu ta relaciona cu trabaonan di boluntarionan ta cosnan cu merece nos aprecio y nos atencion, pa para keto un rato na dje. Aruba Doet a bira un evento hopi grandi cu ta moviliza hopi boluntario mes. Y pesey, specificamente pa e organizacion aki di Aruba Doet, mi tin un aprecio hopi grandi.
Tambe e hecho cu esaki a bira algo cu ta den henter nos Reino ta tuma lugar, tanto na Aruba manera nos ta tende y e otro islanan y na Hulanda. No ta por nada, nos ta considera e trabao boluntario manera e cement cu tin den nos sociedad, pasobra e ta asina realmente.
Wak awe mainta, wak rond di nos, wak con e hendenan ta bin hunto pa motibo di e trabao boluntario. Esey ta loke nos tin mester pa nos isla, caminda cu nos ta pone nos mannan hunto, pa logra algo na beneficio di e sociedad, na beneficio di nos comunidad. Pesey mi ta asina contento cu tur e trabaonan cu ta tuma lugar di parti di Aruba Doet” Gobernador Boekhoudt a expresa.
Gobernador a señala tambe cu e trabaonan di e boluntarionan aki por mira nan den iglesianan, scolnan, clubnan deportivo, den diferente proyecto den naturaleza, cu ta wordo desaroya riba e dia aki cu Aruba Doet ta haci su trabaonan.
“Muy en particular mi ta contento ora cu mi ta wak cu trabaonan ta tuma lugar den bario. Y awe, nos ta akinan, den un bario caminda cu mi ta kere cu no frecuentemente, bo ta haya tanto hende asina di bishita y bo a ripara cu nos ta bin hunto den un bario asina, y nos ta siña aprecia tur nos barionan tambe. Dus, e proyecto aki di Cas Sjabururi, ta uno hopi special tambe. Y awe manta ta e gran opening tambe e proyecto aki. Dus, e ta un bunita proyecto pa 60 plusnan, unda ta percura pa planta y tin un hofi caminda hendenan por relaha. Mi ta kere cu nos tur ta conoce esey ora cu bo ta traha den cura, traha cu mata, ora cu bo ta den naturaleza con relahante esey ta pa cada un di nos. Pues, mi ta contento cu specificamente e proyecto aki a wordo scogi pa e apertura awe, di Aruba Doet”.
Pa finaliza, Gobernador Boekhoedt a gradici tur esnan presente pa nan aporte, pero tambe via e medionan di comunicacion e kier a bisa: “Aruba, danki, Danki pa nos tur hunto a uni man awe pa nos traha como boluntarionan pa nos comunidad. Pa haci algo di nos curazon cu lo keda eynan tambe pa contribui na un mihor sociedad di nos tur”.
